ભાવનગર મહાપાલિકા દ્વારા સંકલિત સફાઇ વેળા ગત તા.૨૩મીએ મંત્રેશ કોમ્પ્લેક્ષ નજીક કાર્યવાહી દરમિયાન ડે.કમિશનર બ્રહ્મભટ્ટને કારની ઠોકરે લેવા પ્રયાસ થયો હતો. આ બનાવે ભારે ચકચાર મચાવી હતી. બનાવ બાદ ભાજપના કોર્પોરેટર અને તેનો ભાઇ બચાવની ભૂમિકામાં ઉતરી પડતા કોર્પોરેશનના કર્મચારી વર્તુળમાં ભારે રોષ ઉભો થયો છે. દરમિયાનમાં કમિશનર ઉપાધ્યાયે આ મામલે નમતું નહીં જાખવા નિર્ણય કરતા આજે આ બનાવને આઠમાં દિવસે પણ ઓડી કાર હજુ લોક થયેલી અવસ્થામાં જ પડી રહી છે.આ ચકચારી કિસ્સામાં કાર ચાલકની અઢાર વર્ષની ઉંમરને ધ્યાને લઇ તેની કારકિર્દીનો વિચાર કરી ડે.કમિશનરે માનવતા દાખવતા કોઇ પોલીસ કાર્યવાહી કરાઇ નથી પરંતુ કાર ચાલક પાસે સત્તાવાર રીતે માફીનામુ લેવા તંત્રએ મિજાજ દાખવતા રૂ.૩૦૦ના સ્ટેમ્પ પેપર પર માફીનામુ લખાવવા ખુદ નગરસેવક હવે મધ્યÂસ્થ બન્યા છે. માફીનામા માટે હાલ તજવીજ ચાલી રહી છે. બીજી બાજુ આ ઓડી કાર નં.જીજે-૦૧-આરડી-૩૪૪૮ ભાવનગરમાં ફરતી હોવાથી ભાવનગર મહાપાલિકાને રોડ ટેક્સ ચુકવવાનો નિયમ મુજબ થાય છે આથી રૂ.૧૫ હજાર રોડ ટેક્સ વસૂલવામાં આવ્યો હતો. જ્યારે લોકનો દંડ રૂ.૩ હજાર કરાયો છે. માફીનામા બાદ આ કારનો છુટકારો થશે તેમ વધુમાં જાણવા મળ્યું છે.
