ભાલના દેવળીયા ગામ નજીક બાઈક અકસ્માતમાં યુવકનું મોત

ભાવનગરના ભાલ પંથકમાં આવેલા દેવળીયા પાસે રોડ પર નીલગાય આડી ઉતરતા બાઈક અકસ્માતની ઘટના બાઈક ચાલક યુવકનું ઘટના સ્થળે કમકમાટીભર્યુ મોત નીપજ્યું હતું.
આ બનાવ અંગેની પ્રાપ્ત થતી માહિતી અનુસાર સચિનભાઈ ઘનશ્યામભાઈ ખોખાણી નામના ૧૯ વર્ષીય યુવક તેમનું બાઈક લઈને દેવળીયા થી પાળીયાદ તરફ જઈ રહ્યા હતા તે દરમિયાન દેવળીયા નજીક અચાનક જ રોડ વચ્ચે નીલગાય આડી ઉતરતા તેમની બાઈકનો અકસ્માત થયો હતો. અકસ્માતની આ ઘટનામાં સચીનભાઈને ગંભીર ઇજાઓ પહોંચતા તેમનું ઘટના સ્થળે જ કમકમાટીભર્યું મોત નીપજ્યું હતું.
આ ઘટનાની જાણ થતાં પોલીસ દોડી ગઈ હતી અને મૃતદેહને પીએમ માટે ભાવનગરની સર ટી હોસ્પિટલ ખાતે ખસેડી વધુ તપાસ હાથ ધરી હતી.