સુપ્રસિદ્ધ અને પવિત્ર યાત્રાધામ સાળંગપુરના કષ્ટભંજનદેવ હનુમાનજી મહારાજનો ૧૭૪મો વાર્ષિક પાટોત્સવ આજે તા.૧૪ને શુક્રવારના ભવ્ય રીતે ઉજવાયો. જેમાં દાદાના દર્શન, અભિષેક, અન્નકૂટ,મારુતિ યજ્ઞ પૂજન દર્શન, કથાશ્રવણના દર્શન એવં વડતાલ દેશ પિઠાધિપતિ પ.પૂ.ધ.ધુ.૧૦૦૮ આચાર્ય રાકેશપ્રસાદજી મહારજ, લાલજી મહારાજ -બ્રહ્મનિષ્ઠ સંતોના દર્શન-આશીર્વચન વિગેરેનો લાભ ભક્તોએ લીધો હતો.
આ પ્રસંગે સવારે 5:30 કલાકે મંગળા આરતી, સવારે 7:00 કલાકે શણગાર આરતી, સવારે 8:00 કલાકે અભિષેક, 11:00 કલાકે છપ્પનભોગ અન્નકૂટ આરતી તેમજ પ.પૂ.ધ.ધુ.૧૦૦૮ આચાર્ય રાકેશપ્રસાદજી મહારજ દ્વારા યજ્ઞ પૂર્ણાહૂતી કરવામાં આવેલ.
કથાકાર શાસ્ત્રી સ્વામી હરિપ્રકાશદાસજી(અથાણાવાળા)દ્વારા પોતાની સુમધુરશૈલીમાં “શ્રી હનુમાન ચરિત્ર કથા” શ્રવણ કરાવી પૂર્ણાહૂતિ બપોરે 12:00 કલાકે કરવામાં આવેલ હતી.
કષ્ટભંજનદેવ હનુમાનજી મહારાજનો ૧૭૪મો વાર્ષિક પાટોત્સવ નિમિતે દાદાને વિશેષ વાઘાનો તેમજ સિંહાસનને ફૂલોથી શણગારવામાં આવેલ તથા દાદાના મંદિરને રોશનીથી શણગારવામાં આવ્યુ હતું અને સંસ્થા દ્વારા વિશેષ સગવડ કરવામાં આવી હતી.
કષ્ટભંજનદેવ હનુમાનજી મહારાજનો ૧૭૪મો વાર્ષિક પાટોત્સવ પ્રસંગે મંદિરના કોઠારી વિવેકસાગરદાસજી સ્વામી એવં શાસ્ત્રી સ્વામી હરિપ્રકાશદાસજી(અથાણાવાળા) તથા તમામ સંતમંડળ-પાર્ષદમંડળ દ્વારા સમગ્ર મહોત્સવનું સંચાલન કરવામાં આવ્યુ હતું.
