સુરતથી ભાવનગરના સિહોર ખાતે લગ્નપ્રસંગમાં આવી રહેલા વૃદ્ધને કેફી પદાર્થયુક્ત ચા પીવરાવી બેભાન બનાવી લૂંટ કર્યાના દિવસે જ ભાવનગરથી સુરત જઈ રહેલા વૃદ્ધને બેભાન બનાવી લૂંટ થયાનો બીજો કિસ્સો નોંધાયો હતો.
આ અંગે પ્રાપ્ત વિગતો મુજબ ભાવનગરની નારી ચોકડીથી સુરત જતી લક્ષ્મી ટ્રાવેલ્સમાં નારી ચોકડીથી બસમાં બેઠેલા દલપતભાઇ આલજીભાઇ પરમાર (ઉં.વ.૬૫)નામના વ્યÂક્તને બસમાં બેઠેલ કોઇ અજાણ્યા શખ્સ સાથે મિત્રતા થઇ જતા અજાણ્યા શખ્સે દલપતભાઇને ચા માં કેફી પીણું પીવડાવી બેભાન કરી દિધા હતા. બાદમાં આ ગઠિયાએ દલપતભાઇ પાસે રહેલ રૂ.૯ હજાર રોકડા, વીંટી અને હિરાના પેકટ ચોરી બસમાંથી કોઇ જગ્યાએ ઉતરી ગયો હતો. આ બનાવ અંગે અજાણ્યા શખ્સ વિરુદ્ધ વરતેજ પોલીસ મથકમાં ફરિયાદ નોંધાવતા વરતેજ પોલીસે વધુ તપાસ હાથ ધરી હતી. ભાવનગર અને સુરત વચ્ચે ચાલતી ખાનગી ટ્રાવેલ્સની બસમાં એકલા મુસાફરી કરતા વૃદ્ધ મુસાફરોને બેભાન બનાવી તેમને લૂંટી લેવા માટે ટોળકી સક્રિય થઈ હોય તેમ છેલ્લા દિવસોમાં આ પ્રકારની ત્રણ ઘટના પ્રકાશમાં આવી છે.
૧૫ દિવસ પૂર્વેની અને ગઇકાલની પ્રથમ ઘટનામાં આરોપી એક જ
સુરતથી ભાવનગર આવી રહેલ એક વૃદ્ધને ૧૫ દિવસ પૂર્વે ચામાં કેફી પીણુ પીવડાવી બેભાન કરી લૂંટી લેવાયાની ઘટના ઘટી હતી. જ્યારે ગઇકાલે બે ઘટના બની તેમાં પ્રથમ ઘટનામાં સિહોર આવી રહેલા વૃદ્ધને આ જ પદ્ધતિએ લૂંટી લેવાયા હતાં. આ બન્ને ઘટનામાં આરોપી એક જ હોવાનું અને પોલીસે સીસીટીવી ફુટેજના આધારે તપાસનો દોર આગળ ધપાવ્યો હોવાનું સુત્રો દ્વારા જાણવા મળ્યું છે.
