મુખ્યમંત્રી, ડો.માંડવીયા, હર્ષ સંઘવી અને પાટીલ સહિતની ભાજપની નેતાગીરી ૨૩મીએ ભાવનગરના મહેમાન બનશે

ભાવનગર, તા.૧૨
ભાવનગરમાં આગામી તા.૨૩ એપ્રિલને અખાત્રીજના પર્વે જૈન સમાજ દ્વારા આયોજીત ઇક્ષુરસોત્સવમાં સહભાગી થવા રાજ્યના મુખ્યમંત્રી ભુપેન્દ્રભાઇ પટેલ ભાવનગર આવશે તેમ જાણવા મળ્યું છે. આ ઉપરાંત આયોજકોએ કેન્દ્રીય મંત્રી ડો.મનસુખભાઇ માંડવીયા, રાજ્યના ગૃહમંત્રી હર્ષભાઇ સંઘવી તથા પ્રદેશ ભાજપ પ્રમુખ સી.આર. પાટીલ સહિતની ભાજપની ટોચની નેતાગીરીને આમંત્રીત કરી છે. સંભવ છે કે, આ દરેક નેતાગણની આ પ્રસંગમાં ઉપસ્થિતિ રહે.
ભાવનગર ખાતે ૭૫૦ થી અધિક સામુદાયીક વર્ષીતપની આરાધના ગચ્છનાયક હેમચંદ્રસુરિ, પ.પૂ. આચાર્ય નિર્મળચંદ્રસુરિશ્વરજી મ.સા., આચાર્ય જીનેશચંદ્રસુરિશ્વરજી મ.સા.ની નિશ્રામાં ચાલી રહી છે આ ઐતિહાસિક વર્ષીતપ પરિપૂર્ણતાને આરે છે. દરેક તપસ્વીઓના અખાત્રીજના પર્વે ભાવનગરમાં જવાહર મેદાન ખાતે ખાસ ઉભી કરાયેલી હસ્તીનાપુર નગરી ખાતે પારણા થશે. ભાવનગર જૈન શ્વેતામ્બર મૂર્તિપૂજક તપાસંઘના આંગણે આ ઐતિહાસિક અને ભવ્ય સમારોહ આયોજીત થયો છે ત્યારે તેમાં સહભાગી થવા ભાજપની ટોચની નેતાગીરીને આયોજકો દ્વારા આમંત્રણ અપાયું છે. જેમાંથી અનુકૂળતા મુજબ દરેક નેતાગણની ઉપસ્થિતિ રહેશે તેમ જાણવા મળ્યું છે.