ડમીકાંડમાં SIT દ્વારા વધુ બે આરોપીઓની ધરપકડ કરાઈ છે. ટીમે ડમી કાંડમાં ઉમેદવારની બદલે પેપર આપનારા મિલન બારૈયા અને એસટીમાં નોકરી કરતા વિરમદેવસિંહ ગોહિલની ધરપકડ કરી છે.
ભાવનગરના ડમીકાંડ મામલે તપાસનો ધમધમાટ શરૂ થઈ ચૂક્યો છે. છેલ્લા 10 દિવસથી ડમી ઉમેદવાર અંગે પોલીસ કાર્યવાહી કરી રહી છે. આરોપીઓને ઝડપી પાડવા માટે પોલીસની ટીમો ભાવનગરના ગામડાઓ ખૂંદી રહી છે. આ વચ્ચે વધુ 2 આરોપીઓને પોલીસે દબોચી લીધા છે.
SIT દ્વારા આરોપી મિલન ઘુઘાભાઇ બારૈયા (રહે. સરતાનપર) અને વિરમદેવસિંહ નાગભા ગોહિલ (રહે. ઉમરાળા, વડોદ તાલુકો)ને ઝડપી લઇ આગળની કાર્યવાહી હાથ ધરી છે. SITએ વડોદ ગામના 42 વર્ષીય વિરમદેવસિંહની ધરપકડ કરી છે. ડમી ઉમેદવાર રાખી વિરમદેવસિંહ પાસ થયો હતો. વિરમદેવસિંહ હાલ એસટીમાં નોકરી કરી રહ્યો છે. ભાવનગર ડમીકાંડ મામલે પોલીસે અત્યાર સુધીમાં 8 આરોપીઓની ધરપકડ કરી છે.
ભાવનગરનો ડમીકાંડનો રેલો અમરેલી સુધી પહોંચ્યો છે, અમરેલીના દુધાળા ખાતેથી મિલન ઘુઘાભાઇ બારૈયાની ધરપકડ કરાઇ છે. જોકે, તપાસમાં સામે આવ્યું છે કે મિલન બારૈયાએ અત્યાર સુધીમાં 7 પરીક્ષા આપી છે. તે સગીર હતો ત્યારથી જ તેણે ડમી વિદ્યાર્થી તરીકે પરિક્ષા આપવાનું શરૂ કર્યું હતું
પોલીસ કરી રહી છે આરોપીઓની શોધખોળ
રાજ્યભરમાં ફેલાયેલા ડમીકાંડનું દંગલ હવે ધીમે ધીમે એક પૂર્વ આયોજીત ષડયંત્રનો ભાગ હોવા તરફ ઇશારો કરી રહ્યું છે. આ પ્રકરણમાં હાથ ધરાયેલ પોલીસ તપાસમાં એક પછી એક સામે આવી રહેલા ખુલાસા ઇશારો કરી રહ્યા છે કે, આ એક સુઆયોજીત રીતે વર્ષોથી ડમીના નામે પરીક્ષા પાસ કરીને નોકરી મેળવવાનો ગોરખધંધો ચાલી રહ્યો હતો. આમ સમગ્ર કૌભાંડમાં અત્યાર સુધી 38 આરોપીઓ થયા છે. જેમાંથી ભાવનગર પોલીસે અત્યાર સુધીમાં ડમીકાંડમાં કુલ 8 આરોપીઓની ધરપકડ કરી છે. જ્યારે આ કૌભાંડના અન્ય આરોપીઓ ભૂગર્ભમાં ઉતરી ગયા છે. પોલીસની ટીમો તળાજા, સિહોરમાં શોધખોળ કરી રહી છે. પોલીસ પાસે આરોપીના નામ, સરનામા છે, છતાં સફળતા મળી રહી નથી.
