ગુજરાત હાઇકોર્ટમાં જાહેર સ્થળોએ ટ્રાન્સજેન્ડર માટે અલગ ટોઇલેટની માગ સાથે અરજી કરવામાં આવી હતી. સ્ત્રી અને પુરુષ માટેના શૌચાલયમાં ટ્રાન્સજેન્ડર જાય તો ટ્રાન્સજેન્ડરની હાજરીના કારણે ઉભા થતા ક્ષોભનો મુદ્દો અરજીમાં ઉઠાવાયો છે. સ્વચ્છ ભારત મિશન અંતર્ગત જાહેરાત બાદ પણ ટ્રાન્સજેન્ડર માટે અલગ શૌચાલય ન બન્યા હોવાની અરજદારની રજૂઆત છે.
ભારતમાં આશરે 4-5 લાખ જેટલા ટ્રાન્સજેન્ડર છે. આવી જ એક અરજી દિલ્હી હાઈકોર્ટમાં થઈ છે. જેમાં રાજ્ય અને કેન્દ્ર સરકાર પાસે જવાબ માગ્યો છે. આ સાથે જ દિલ્હીમાં આવા 500 ટોઈલેટ બાંધવાનો હુકમ કરાયો છે, જેમાં 12 જેટલા ટોઇલેટ્સ બની ચુક્યા છે.
જાહેર સ્થળોએ ટ્રાન્સજેન્ડર માટે ગુજરાતમાં ટોઈલેટની કોઈ અલગ વ્યવસ્થા કરવામાં આવી નથી. હોટેલોમાં કોમન ટોયલેટ હોય છે પરંતુ, મહિલાઓ અને પુરુષોની જેમ ટ્રાન્સજેન્ડર માટે કોઈ અલગ વ્યવસ્થા નથી. કોર્ટે આ મુદ્દે હસ્તક્ષેપ કરી જરૂરી નિર્દેશો આપે તેવી અરજદાર દ્વારા માંગણી કરાઈ છે.
હાઇકોર્ટે અરજી પ્રાથમિક રીતે સ્વીકારી કેન્દ્ર સરકાર સહિતના પક્ષકારોને નોટિસ ઇસ્યુ કરી છે. જે મુદ્દે આગામી 16 જૂને વધુ સુનાવણી હાથ ધરવામાં આવશે.
