યૂક્રેનના બખમુત શહેર પર રશિયાનો ફોસ્ફરસ બોમ્બ હુમલો

યૂક્રેનની સેના દ્વારા શેર કરવામાં આવેલા એક લેટેસ્ટ વીડિયો ફૂટેજમાં જોવા મળે છે કે શહેરની ઉપર ફોસ્ફરસનો વરસાદ થઇ રહ્યો છે અને સમગ્ર શહેર આગમાં સળગતું દેખાય છે. યૂક્રેનના સંરક્ષણ મંત્રાલયે પણ પોતાના ટ્વિટર એકાઉન્ટ પર આ વીડિયો શેર કર્યો છે. ઉલ્લેખનીય છે કે યુદ્ધમાં સફેદ ફોસ્ફરસના હથિયારો પર પ્રતિબંધ નથી, પણ નાગરિક ક્ષેત્રમાં તેનો ઉપયોગ યુદ્ધ અપરાધ માનવામાં આવે છે, કેમ કે તે ઝડપથી પ્રસરે છે અને તેની આગને ઠારવી ખૂબ જ મુશ્કેલ હોય છે. રશિયા પર પહેલાં પણ તેના ઉપયોગના આરોપો લાગ્યા છે.
નોંધનીય છે કે એક વર્ષ કરતાં વધારે સમયથી ચાલી રહેલાં આ યુદ્ધમાં લાખો લોકો મરાયા છે અને લાખો લોકો બેઘર થયાં છે તથા અબજો ડોલર્સની સંપત્તિનો નાશ થયો છે, તેમ છતાં આ યુદ્ધનો ફેંસલો આવવાનો હજુ બાકી છે. રશિયા પાછલા મહિનાઓથી વ્યૂહાત્મક રીતે મહત્ત્વના ગણાતા બખમુત શહેર પર કબજો કરવાનો પ્રયત્ન કરી રહ્યું છે. પશ્ચિમના અધિકારીઓ દાવો કરે છે કે રશિયાએ આ શહેર પર કબજો મેળવવા માટે તેના હજારો સૈનિકોની કુરબાની આપી દીધી છે અને હજુ સફળતા હાંસલ થઇ શકી ના હોવાના કારણે હવે ફોસ્ફરસ બોમ્બનો ઉપયોગ કર્યો હોવાનું માનવામાં આવે છે. યૂક્રેનનું સંરક્ષણ મંત્રાલય લખે છે કે હુમલાએ આગ લગાવતાં દારૂગોળા સાથે બખમુતના ક્ષેત્રોને નિશાન બનાવ્યા હતાં.