આપણે ઘણીવાર સાંભળીએ છીએ કે ટૂંક સમયમાં જ તેઓ સાત ફેરા લઈને લગ્નના બંધનમાં બંધાવાના છે. હિંદુ ધર્મમાં લગ્ન સમયે સાત ફેરા લેવામાં આવે છે તે તો બધા જ જાણે છે. આ દરમિયાન કન્યા અને વરરાજા અગ્નિને સાક્ષી માનીને 7 ફેરા લે છે.
આ સાત ફેરા દરમિયાન, વર અને કન્યા મંત્રો અને વચનો સાથે અગ્નિના સાત ફેરા લે છે અને સાત જન્મો માટે એકસાથે જોડાઈ જાય છે. હિન્દુ ધર્મમાં લગ્નના બંધનને ખૂબ જ પવિત્ર માનવામાં આવે છે. કહેવાય છે કે આ માત્ર શારીરિક જ નહીં પરંતુ આધ્યાત્મિક સંબંધ પણ હોય છે, પરંતુ શું તમે ક્યારેય વિચાર્યું છે કે લગ્ન દરમિયાન આપણે સાત ફેરા જ કેમ લઈએ છીએ.
હિંદુ ધર્મમાં 16 ધાર્મિક વિધિઓને ખૂબ મહત્ત્વ આપવામાં આવ્યું છે. તેને માનવજીવનનો મહત્ત્વનો ભાગ પણ કહી શકાય. લગ્ન સમયે, જ્યાં સુધી વર-કન્યા સાત ફેરા ન ફરે ત્યાં સુધી લગ્ન પૂર્ણ માનવામાં આવતા નથી. આ 7 ફેરાની પ્રક્રિયાને ‘સપ્તપદી’ પણ કહેવામાં આવે છે. ‘સપ્તપદી’ દરમિયાન, વર અને કન્યા એકસાથે ફેરા લે છે અને સાત જન્મો સુધી મન અને આત્મા સાથે સંબંધનું વચન આપે છે. આ ફેરા સાથે સાત વચનો પણ લેવામાં આવે છે. સાતમાંથી દરેક વચનોનું ખૂબ મહત્ત્વ હોય છે.
શા માટે 7 ફેરા લેવામાં આવે છે?
ભારતીય સંસ્કૃતિમાં 7 નંબરને ખૂબ જ શુભ માનવામાં આવે છે. સૂર્યના 7 ઘોડા, મંદિર અથવા મૂર્તિની 7 પરિક્રમા, 7 રંગ, સંગીતના 7 સૂર, 7 સમુદ્ર, 7 ચક્ર, 7 ગ્રહ, 7 લોક, 7 તારા, 7 દિવસ, 7 ટાપુઓ અને 7 ઋષિઓનું વર્ણન છે. આ સાથે ઊર્જાના 7 કેન્દ્રો પણ હોય છે.
આ બાબતોને ધ્યાનમાં રાખીને લગ્ન દરમિયાન 7 ફેરા લેવામાં આવે છે. વૈદિક અને પૌરાણિક માન્યતાઓ અનુસાર 7 અંકોને પૂર્ણ માનવામાં આવે છે, એટલા માટે લગ્ન સમયે સાત ફેરા લેવામાં આવે છે.
શરીરમાં ઉર્જાના 7 કેન્દ્રો હોય છે –
એવું કહેવાય છે કે આપણા શરીરમાં ઉર્જાના 7 કેન્દ્રો હોય છે. આપણે તેમને ચક્રો પણ કહીએ છીએ. આ સાત શક્તિઓ આપણા શરીર સાથે જોડાયેલી હોય છે, એવી રીતે લગ્ન સમયે આ શક્તિઓને શરીરના સૌથી ઊંડા ભાગોમાં એકીકૃત કરવાની વિધિ કરવામાં આવે છે. આ કારણે લગ્ન સમયે 7 ફેરા લેવાની જોગવાઈ છે.
