કેનેડામાં સડક પર ઉતર્યા ભારતીય વિદ્યાર્થીઓ

કેનેડામાં ફરજિયાત ભારત પરત ફરવા મજબૂર કરાયેલા લગભગ 700 ભારતીય વિદ્યાર્થીઓ રસ્તા પર ઉતરી આવ્યા હતા.મોટી સંખ્યામાં ભારતીય વિદ્યાર્થીઓ પર “બનાવટી ઓફર લેટર્સ દ્વારા પ્રવેશ” લેવાનો આરોપ છે. તેમાંથી મોટાભાગના પંજાબ રાજ્યના છે. હવે આ વિદ્યાર્થીઓ સંભવિત ડિપોર્ટેશન – દેશ નિકાલ સામે કેનેડાના રસ્તાઓ પર વિરોધ પ્રદર્શન કરી રહ્યા છે. છેલ્લા એક સપ્તાહથી વધુ સમયથી વિદ્યાર્થીઓનો વિરોધ ચાલી રહ્યો છે. તેઓ કેનેડા બોર્ડર સર્વિસીસ એજન્સી ની મુખ્ય કચેરીની બહાર, મિસીસૌગાના એરપોર્ટ રોડ પર 29 મેથી “અનિશ્ચિત સમયના ધરણા” માટે ભેગા થયા છે.
પંજાબના મુખ્યમંત્રી ભગવંત માનના નિર્દેશને પગલે કેનેડામાંથી બળજબરીથી પરત મોકલવામાં આવતા લગભગ 700 વિદ્યાર્થીઓના મુદ્દાને ઉકેલવા પંજાબના એક મંત્રીએ સોમવારે વિદેશ મંત્રી એસ જયશંકરને પત્ર લખ્યો હતો. ધાલીવાલે કહ્યું કે ટ્રાવેલ એજન્ટોની છેતરપિંડીથી આ વિદ્યાર્થીઓ કેનેડાની ખોટી કોલેજોમાં ફસાયા છે. ધાલીવાલે કેન્દ્ર સરકાર પાસે તેમના વતન પરત ફરવાનું રોકવા અને કેનેડાની સરકાર પાસેથી આ વિદ્યાર્થીઓને વર્ક પરમિટ અપાવવા તાત્કાલિક પગલાં લેવાની માંગ કરી છે.
આ ઉપરાંત ભટિંડાના સાંસદ અને પૂર્વ કેન્દ્રીય મંત્રી હરસિમરત કૌર બાદલે વિદેશ મંત્રી ડૉ.જયશંકરને સેંકડો એવા પંજાબી વિદ્યાર્થીઓના ભવિષ્યને બચાવવા વિનંતી કરી છે જેઓ એજન્ટની છેતરપિંડીને કારણે ડિપોર્ટેશનની સંભાવનાનો સામનો કરી રહ્યા છે. તેમણે કહ્યું કે અગાઉ લગભગ 700 વિદ્યાર્થીઓને આ કાર્યવાહીનો સામનો કરવો પડ્યો હતો અને આ પછી 200 વધુ વિદ્યાર્થીઓને ડિપોર્ટ કરવાનો આદેશ આપવામાં આવ્યો હતો.
કેનેડિયન બોર્ડર સર્વિસીસ એજન્સીએ ખુલાસો કર્યો છે કે આ વિદ્યાર્થીઓને એક અધિકૃત એજન્ટ – એજ્યુકેશન માઈગ્રેશન સર્વિસીસ, જલંધર દ્વારા નકલી દસ્તાવેજો પૂરા પાડવામાં આવ્યા હતા. આ એજન્ટે નામાંકિત કોલેજમાં ભણવા માટે આ વિદ્યાર્થીઓને નકલી એડમિટ કાર્ડ આપ્યા હતા અને આ માટે તેમની પાસેથી 16થી 20 લાખ રૂપિયા લીધા હતા. આ વિદ્યાર્થીઓ કેનેડા પહોંચ્યા કે તરત જ ત્યાંના સત્તાવાળાઓ દ્વારા તેમને જાણ કરવામાં આવી કે તેમનો પ્રવેશ રદ કરવામાં આવ્યો છે.