ફ્રાન્સમાં રમખાણો કરવામાં મોટાભાગના સગીર

ફ્રાન્સમાં પોલીસના હાથે 17 વર્ષના છોકરાના મોત બાદ શરૂ થયેલી હિંસા હજુ પણ ચાલુ છે. ફ્રેન્ચ મીડિયા અનુસાર, પોલીસે રવિવારે 49 લોકોની ધરપકડ કરી હતી. આ પહેલા રવિવારે 719 અને શુક્રવારે 1,300 લોકોની ધરપકડ કરવામાં આવી હતી. ફ્રાન્સમાં અત્યાર સુધીમાં 3 હજારથી વધુ લોકોની અટકાયત કરવામાં આવી છે. ફ્રાન્સના રાષ્ટ્રપતિ ઈમેન્યુઅલ મેક્રોન મંગળવારે 220 નગરો અને શહેરોના મેયરોને પણ મળશે.
ફ્રાન્સમાં રમખાણોને કારણે અટકાયત કરાયેલા મોટાભાગના લોકો સગીર છે. ફ્રાંસના ગૃહમંત્રી ગેરાલ્ડ ડારમાનિને જણાવ્યું કે અટકાયતમાં લેવાયેલા 2 હજારથી વધુ લોકોની સરેરાશ ઉંમર 17 વર્ષ છે. હિંસામાં 50થી વધુ સુરક્ષાકર્મીઓ ઘાયલ થયા છે. તોફાનીઓએ 26 પોલીસ સ્ટેશન સહિત 74 ઇમારતોને નુકસાન પહોંચાડ્યું છે. 577થી વધુ વાહનોને આગના હવાલે કરવામાં આવ્યા છે.
તોફાનીઓએ પેરિસના ઉપનગરોમાં મેયરના ઘર પર હુમલો કર્યો. તેઓએ એક કાર મેયરના ઘરની અંદર ઘૂસાડી દીધી અને તેને આગ ચાંપી દીધી. આ દરમિયાન મેયરના પત્ની અને તેમના 5 અને 7 વર્ષના બે પુત્રો ઘરમાં હાજર હતા. ત્રણેયે ભાગીને પોતાનો જીવ બચાવ્યો હતો. આ દરમિયાન તેમની પત્ની અને એક પુત્ર ઘાયલ થયા હતા.