રશિયામાં મખાચકલા શહેરના એરપોર્ટના રનવે પર પેલેસ્ટાઈન સમર્થકોએ કર્યો કબ્જો

ઇઝરાયેલ અને હમાસ વચ્ચે યુદ્ધ ચાલુ છે. ઈઝરાયેલ ગાઝામાં સતત સૈન્ય કાર્યવાહી કરી રહ્યું છે. આ બધાની વચ્ચે રવિવારે પેલેસ્ટાઈન સમર્થકો દક્ષિણી રશિયન વિસ્તાર દાગેસ્તાનના મખાચકલા શહેરમાં એરપોર્ટના રનવે પર અચાનક પહોંચી ગયા હતા. આ સમય દરમિયાન, વિરોધ કરી રહેલા લોકોએ રનવે બંધ કરી દીધો હતો. રશિયન એવિએશન ઓથોરિટી રોસાવિયેટ્સિયાએ દાગેસ્તાન ક્ષેત્રમાં મખાચકલા જતી તમામ ફ્લાઇટ્સ અન્ય એરપોર્ટ પર ડાયવર્ટ કરી હતી.
મીડિયાના અહેવાલો અનુસાર, આ લોકો ગાઝામાં ઈઝરાયેલની કાર્યવાહીની નિંદા કરવા માટે એકઠા થયા હતા. દેખાવકારોનો એક વીડિયો પણ સામે આવ્યો છે, જેમાં પ્રદર્શનકારીઓના મોટા જૂથો એર ટર્મિનલમાં પ્રવેશતા અને પછી અંદરના તમામ રૂમને તોડી નાખતા જોઈ શકાય છે. વિરોધીઓએ પેલેસ્ટિનિયન ધ્વજ લહેરાવતા અને “અલ્લાહુ અકબર” ના નારા લગાવતા એરપોર્ટ બિલ્ડીંગ પર હુમલો કર્યો.
પરિસ્થિતિને જોતા, ઇઝરાયેલે રશિયન સત્તાવાળાઓને ઇઝરાયેલ અને યહૂદીઓની સુરક્ષા કરવા વિનંતી કરી. જેરુસલેમમાં વિદેશ મંત્રાલયના એક નિવેદનમાં કહેવામાં આવ્યું છે કે મોસ્કોમાં ઇઝરાયેલના રાજદૂત રશિયન અધિકારીઓ સાથે કામ કરી રહ્યા છે. નિવેદનમાં કહેવામાં આવ્યું છે કે, “ઇઝરાયેલ ઇઝરાયલી નાગરિકો અને યહૂદીઓને ગમે ત્યાં નુકસાન પહોંચાડવાના પ્રયાસોને ગંભીરતાથી લે છે.”