સુરત જિલ્લાના પલસાણા તાલુકાના એના ગામે ગઈકાલે રાત્રે એક દર્દનાક ઘટના સામે આવી હતી. શિવાલિક સોસાયટીમાં રહેતા રાકેશ નાયક પોતાની પત્ની અને દીકરા-દીકરી સાથે બેડરૂમમાં સૂતા હતા. એ દરમિયાન ઘરમાં ચોરી કરવાના ઇરાદે આવેલા ઈસમે રાકેશભાઈનું મોઢું અને ગળું દબાવી હત્યા કરી હતી, જ્યારે પુત્રી અને પત્ની જાગી જતાં ચોરે તેમને પણ હત્યાની ધમકી આપી ડરાવી ધમકાવી ચૂપ કરી દીધા હતા. જ્યારે ઘરમાંથી સોના-ચાંદીનાં ઘરેણાં અને લેપટોપ સહિત અઢી લાખની ચોરી કરી ભાગી ગયો હતો. બનાવને પગલે સુરત જિલ્લા પોલીસ દોડતી થઈ ગઈ હતી.
ગત રાત્રે શિવાલિક સોસાયટીમાં શાળામાં ક્લાર્કની નોકરી કરતા રાકેશભાઈ પોતાના પરિવાર સાથે શાંતિથી સૂતા હતા. એ દરમિયાન બારીનો દરવાજો ખોલી એક ચોર ઘરમાં પ્રવેશ્યો હતો. તે ચોરી કરતો હતો એ દરમિયાન રાકેશભાઈ જાગી ગયા હતા, આથી ચોર અને રાકેશભાઈ વચ્ચે ઝપાઝપી થઈ હતી.
ચોરે રાકેશભાઈના મોઢા ઉપર કોઈક પ્રવાહીનો સ્પ્રે કરી તેમનું મોઢું દબાવી હત્યા કરી નાખી હતી. જોકે રાકેશભાઈની 12 વર્ષીય પુત્રી અને પત્ની જાગી જતાં ચોરે તેમને પણ હત્યા કરી નાખવાની ધમકી આપી ચૂપ કરી દીધા હતા. ત્યાર બાદ ચોર ઘરમાં મૂકેલું રાકેશભાઈનું લેપટોપ અને સોના-ચાંદીના ઘરેણાં સહિત અઢી લાખની ચોરી કરી ફરાર થઈ ગયો હતો. ઘટનાની જાણ આસપાસના લોકોને થતાં તેઓ ભેગા થઈ ગયા હતા અને ઘટનાની જાણ પોલીસને કરી હતી.
