સંસદના શિયાળુ સત્રમાં ભારે હંગામો થયો હતો, ત્યારબાદ હંગામાને કારણે 141 સાંસદોને સસ્પેન્ડ કરવામાં આવ્યા હતા. વિપક્ષના સાંસદો 19 ડિસેમ્બરે સંસદ ભવન બહાર બેસીને વિરોધ કરી રહ્યા હતા. આ દરમિયાન તૃણમૂલ કોંગ્રેસના સાંસદ કલ્યાણ બેનર્જીએ રાજ્યસભાના અધ્યક્ષ જગદીપ ધનખડની નકલ કરી, જેનાથી ઉપરાષ્ટ્રપતિ ગુસ્સે થયા. ઘટનાને શરમજનક ગણાવતા ઉપરાષ્ટ્રપતિએ કહ્યું કે એક સાંસદ મજાક ઉડાવી રહ્યા છે અને બીજો સાંસદ તે ઘટનાનો વીડિયો બનાવી રહ્યો છે તે હાસ્યાસ્પદ અને અસ્વીકાર્ય છે.
સંસદમાંથી હાંકી કાઢવામાં આવેલા સાંસદોને સંસદમાં પ્રવેશતા અટકાવવામાં આવ્યા છે. મંગળવારે મોડી રાત્રે લોકસભા સચિવાલયે એક પરિપત્ર જાહેર કરીને આ સાંસદોને સંસદની ચેમ્બર, લોબી અને ગેલેરીમાં આવવા પર પ્રતિબંધ મૂક્યો છે. રાજ્યસભાના સભાપતિ જગદીપ ધનખડની નકલ કરવા બદલ TMC સાંસદ કલ્યાણ બેનર્જી વિરુદ્ધ FIR નોંધવામાં આવી છે.
વડાપ્રધાન નરેન્દ્ર મોદીએ સાંસદો દ્વારા ઉપરાષ્ટ્રપતિ જગદીપ ધનખડની નકલ કરવાની ઘટનાને દુર્ભાગ્યપૂર્ણ ગણાવી છે. ઉપરાષ્ટ્રપતિએ સોશિયલ મીડિયા પર પોસ્ટ કરીને આ વાત કહી છે. તેમણે કહ્યું કે પીએમ મોદીએ ફોન કરીને આ ઘટના પર શોક વ્યક્ત કર્યો છે. વડાપ્રધાને વાતચીત દરમિયાન એમ પણ કહ્યું કે તેઓ પણ છેલ્લા 20 વર્ષથી આ પ્રકારનું અપમાન સહન કરી રહ્યા છે. એટલું જ નહીં રાષ્ટ્રપતિ દ્રૌપદી મુર્મુએ પણ આ ઘટનાને નિરાશાજનક ગણાવી છે.
સોશિયલ મીડિયા પ્લેટફોર્મ X પર પોસ્ટ કરતાં ઉપરાષ્ટ્રપતિએ કહ્યું, ‘પીએમ મોદી સાથે ટેલિફોન પર વાત થઇ. તેમણે પવિત્ર સંસદ સંકુલમાં કેટલાક સાંસદોના ઘૃણાસ્પદ નકલ પર દુઃખ વ્યક્ત કર્યું. તેમણે મને કહ્યું કે તેઓ છેલ્લા વીસ વર્ષથી આવા અપમાન સહન કરી રહ્યા છે. ભારતમાં ઉપરાષ્ટ્રપતિ જેવા બંધારણીય પદ સાથે સંસદમાં આવું થાય તે દુર્ભાગ્યપૂર્ણ છે.
રાષ્ટ્રપતિ દ્રૌપદી મુર્મુએ કહ્યું, ‘સંસદ સંકુલમાં આપણા આદરણીય ઉપરાષ્ટ્રપતિનું જે રીતે અપમાન થયું તે જોઈને હું નિરાશ થઈ છું. ચૂંટાયેલા પ્રતિનિધિઓ પોતાની અભિવ્યક્તિ માટે સ્વતંત્ર હોવા જોઈએ, પરંતુ તેમની અભિવ્યક્તિ ગૌરવ અને શિષ્ટાચારના ધોરણોમાં હોવી જોઈએ. આ એક સંસદીય પરંપરા રહી છે જેના પર અમને ગર્વ છે અને ભારતના લોકો અપેક્ષા રાખે છે કે તેઓ તેને જાળવી રાખે.
