શહેરમાં વાદળીયા વાતાવરણ વચ્ચે રાત્રીના તાપમાનમાં ૧ ડિગ્રીનો ઘટાડો

ભાવનગર શહેર અને જિલ્લાભરમાં છેલ્લા ત્રણ દિવસથી છવાયેલા વાદળો વચ્ચે ફૂકાઇ રહેલા સુસવાટા મારતા પવનના કારણે દિવસ અને રાત્રીના તાપમાનમાં ઘટાડો થતા ઠંડીનુ પ્રમાણ વધવા પામ્યુ છે. ભાવનગરમાં દિવસના તાપમાનમાં ૧.૮ ડિગ્રી તથા રાત્રીના તાપમાનમાં ૧ ડિગ્રીનો ઘટાડો થતા ઠંડીનો માહોલ છવાયો છે.
કાશ્મીર સહિત ઉતર ભારતમાં થયેલી હિમ વર્ષા બાદ શરૂ થયેલા સુસવાટા મારતા ઉતર પુર્વિય પવનના કારણે સમગ્ર સૌરાષ્ટ્ર અને ગુજરાતમાં ઠંડીનો માહોલ છવાયો છે. મોટાભાગના શહેરોમાં લઘુત્તમ તાપમાન ૧૨ થી ૧૮ ડિગ્રી રહેવા પામ્યુ છે. ભાવનગર શહેરમા છેલ્લા ત્રણ દિવસથી સવારથી બપોર સુધી વાદળો છવાયેલા રહેવા સાથે ટાઢોબોળ પવન ફૂકાઇ રહ્યો છે. બુધવારે દિવસ દરમિયાન વાદળોની સાથે પવનનુ જોર વધારે રહેવાના કારણે મહતમ તાપમાનમાં ૧.૮ ડિગ્રીનો ઘટાડો થયો હતો અને દિવસનુ તાપમાન ૨૫.૨ ડિગ્રી રહ્યું હતું. જયારે રાત્રીનુ તાપમાન પણ ઘટીને ૧૭.૪ ડિગ્રીએ પહોચી જવા પામ્યું છે. સરેરાશ ૧૪ કી.મી.ની ઝડપે પવન ફૂકાવા સાથે ભેજનું પ્રમાણ ૮૩% રહેવા પામ્યુ હતુ.