નાતાલ પર્વને પગલે જૂનાગઢના પર્યટન સ્થળો અને પવિત્ર યાત્રાધામ અંબાજી પર પ્રવાસીઓની ભીડ ઊમટી હતી. ગિરનાર પર્વત, ગિરનાર, ઉપરકોટ, વિલીંગ્ડન ડેમ, સકરબાગ સહિતનાં સ્થળોએ પ્રવાસીઓ ઊમટ્યા હતા. ગિરનાર ક્ષેત્રમાં આવતા પ્રવાસીઓ રોપ-વે તેમજ સીડી મારફતેમાં અંબા અને દત્તાત્રેય ભગવાનનાં દર્શને પર્વત પર જતા જોવા મળ્યા હતા.
આ વર્ષનું અંતિમ અઠવાડિયું ચાલતું હોવાથી લોકોમાં વેકેશનને લઈ ઉત્સુકતા જોવા મળી રહી છે. ગિરનાર પર્વત પર શનિ-રવિ અને નાતાલના તહેવારને લઈ યાત્રિકોની ભીડ ઊમટી હતી. જ્યારે સાસણ અને દેવળિયા સફારી પાર્ક પ્રવાસીઓથી ઉભરાયાં હતાં. જૂનાગઢ શહે૨ના સક્કરબાગ, ઉપરકોટના કિલ્લા પર પણ પ્રવાસીઓથી ખીચોખીચ જોવા મળ્યા હતા. 25 ડિસેમ્બર નાતાલના પર્વ નિમિત્તે જૂનાગઢના ગિરનાર પર્વત પર દર વર્ષે હજારોની સંખ્યામાં યાત્રિકો આવે છે. જેમાંના મોટાભાગના યાત્રિકો ગિરનારની સીડી ચડી અંબાજી અને દત્તાત્રેય સુધી જાય છે. હવે રોપ-વે થઈ ગયો હોવાથી રોપ-વેમાં પણ યાત્રિકો ગિરનારની સફર કરે છે. દેવળિયા પાર્કમાં પાંચ હજાર જેટલા પ્રવાસીઓ ઊમટી પડ્યા હતા. સાસણની આસપાસના હોટલ, રિસોર્ટ, ફાર્મહાઉસમાં પણ પ્રવાસીઓ વેકેશનની મજા માણવા પહોંચી ગયા છે. જૂનાગઢ, મેંદરડા, સાસણ રોડ પર સતત વાહનોનો પ્રવાહ શરૂ રહ્યો છે. ત્રણ દિવસના મિની વેકેશનના કારણે સાસણની હોટલોના ભાડામાં વધારો થયો છે. જૂનાગઢ શહેરના ઉપરકોટ કિલ્લામાં 9100 જેટલા પ્રવાસીઓ મુલાકાતે આવ્યા હતા. તેવી જ રીતે જૂનાગઢ શહેરનું સક્કરબાગ ઝૂ દસ હજારથી વધુ મુલાકાતીઓથી ઉભરાયું હતું. આજે દિવસભર જૂનાગઢ શહેરમાં પ્રવાસીઓની ભીડ જોવા મળી હતી. શિયાળાની કડકડતી ઠંડીની સિઝન ચાલી રહી છે ત્યારે ગીરની ઠંડીની મજા માણવાનો પ્રવાસીઓમાં ક્રેઝ વધી રહ્યો છે. નાતાલ પર્વની ત્રણ દિવસની રાજાઓમાં શનિ, રવિ અને સોમવાર સ્ટેચ્યૂ ઓફ યુનિટી ખાતે પ્રવાસીઓની ભીડ જામી હતી. મિની વેકેશનના પહેલાં દિવસે શનિવારે 50 હજારથી વધુ પ્રવાસીઓ નોંધાયા હતા. જ્યારે રવિવારના દિવસે 80 પ્રવાસીઓ નોંધાયા હતા. સોમવારે પણ જાહેર રજા હોય ત્યારે 50 હજારથી વધુ પ્રવાસીઓ ઊમટી પડ્યા હતા.
