આસામના મુખ્યમંત્રી હિમંતા બિસ્વા સરમાએ બુધવારે કહ્યું કે અમે 2024ની લોકસભા ચૂંટણી પછી રાહુલ ગાંધીની ધરપકડ કરીશું. 23 જાન્યુઆરીના રોજ, પોલીસે ભારત જોડો ન્યાય યાત્રાને ગુવાહાટી શહેરમાં પ્રવેશતા અટકાવવા માટે બેરીકેડ ઉભા કર્યા હતા, જેને કોંગ્રેસના કાર્યકરો દ્વારા હટાવી દેવામાં આવ્યા હતા. આ પછી, આસામના CMએ ડીજીપીને રાહુલ ગાંધી અને કોંગ્રેસના નેતાઓ વિરુદ્ધ FIR નોંધવાનો આદેશ આપ્યો. 24 જાન્યુઆરીએ રાહુલ ગાંધી સિવાય કોંગ્રેસના મહાસચિવ કેસી વેણુગોપાલ, કન્હૈયા કુમાર અને પાર્ટીના અન્ય નેતાઓ વિરુદ્ધ FIR નોંધવામાં આવી હતી.
કેસ નોંધાયાના એક દિવસ પછી, મુખ્યમંત્રીએ કહ્યું- યાત્રાનો સમગ્ર હેતુ આસામને પરેશાન કરવાનો અને શાંતિને જોખમમાં નાખવાનો હતો. અમે એક SIT બનાવીશું, જે કેસની તપાસ કરશે અને લોકસભાની ચૂંટણી પૂરી થયા બાદ અમે રાહુલની ધરપકડ કરીશું. જો અમે હવે પગલાં લઈશું તો તેઓ તેને રાજકીય ચાલ ગણાવશે.
ખડગેએ રાહુલ ગાંધીની સુરક્ષાને લઈને અમિત શાહને પત્ર લખ્યો
કોંગ્રેસ અધ્યક્ષ મલ્લિકાર્જુન ખડગેએ આસામમાં રાહુલ ગાંધીની સુરક્ષાને લઈને ગૃહમંત્રી અમિત શાહને બે પાનાંનો પત્ર લખ્યો છે. પત્રમાં 18 જાન્યુઆરીએ ભારત જોડો ન્યાયયાત્રા આસામમાં પ્રવેશ્યા પછી 22 જાન્યુઆરી સુધી રાહુલની સુરક્ષામાં ખામીની પાંચ ઘટનાઓનો ઉલ્લેખ છે.
ખડગેએ ગૃહમંત્રીને કહ્યું- આસામના મુખ્યમંત્રી અને ત્યાંના ડીજીપીને સૂચના આપો જેથી કોઈ અઘટિત ઘટના ન બને. ખડગેનું કહેવું છે કે યાત્રાના વિરોધમાં ભાજપના સમર્થકો રાહુલના કાફલાની ખૂબ નજીક આવી રહ્યા છે. આવી સ્થિતિમાં રાહુલને પણ પોતાની સુરક્ષાની અવગણના કરીને બહાર આવવાની ફરજ પડી છે. રાહુલને Z+ સિક્યોરિટી મળવી જોઈએ.
