આરબીઆઈ દ્વારા પેટીએમ પેમેન્ટ્સ બેંકને 15 દિવસનો વધુ સમય આપવામાં આવ્યો છે, જેનો અર્થ છે કે ગ્રાહકો 15 માર્ચ સુધી વોલેટ, એકાઉન્ટ, ફાસ્ટેગ અને અન્ય પેટીએમ બેંકિંગ સેવાઓનો ઉપયોગ કરી શકશે. આ પછી, Paytm પેમેન્ટ્સ બેંક પર નિયંત્રણો લાદવામાં આવશે. દરમિયાન, Paytmની પેરેન્ટ કંપનીએ માહિતી આપી છે કે તેણે તેનું નોડલ (મુખ્ય) એકાઉન્ટ એક્સિસ બેંકમાં શિફ્ટ કર્યું છે.
પેટીએમનું નોડલ એકાઉન્ટ એક માસ્ટર એકાઉન્ટ જેવું છે, જે તમામ ગ્રાહકો અને વેપારીઓના વ્યવહારોનું સમાધાન કરે છે. આનો અર્થ એ છે કે જેઓનું Paytm પેમેન્ટ્સ બેંકમાં ખાતું છે તેઓ 15 માર્ચ પછી પણ સરળતાથી તેમના વ્યવહારોનું સમાધાન કરી શકે છે. આ ઉપરાંત QR કોડ, સાઉન્ડબોક્સ અને કાર્ડ મશીન જેવી સેવાઓ પણ ચાલુ રહેશે. પેટીએમ તેની પેટાકંપની પેટીએમ પેમેન્ટ્સ બેંક લિમિટેડ દ્વારા નોડલ એકાઉન્ટનું સંચાલન કરે છે. આરબીઆઈની કડકાઈ બાદ તેના પર પણ સવાલો ઉઠવા લાગ્યા છે. રિપોર્ટ્સમાં કહેવામાં આવી રહ્યું છે કે જો આ એકાઉન્ટને અન્ય કોઈ બેંકમાં શિફ્ટ કરવામાં નહીં આવે તો UPI સર્વિસને ઓપરેટ કરવામાં મુશ્કેલી પડી શકે છે. જોકે, હવે એક્સિસ બેન્કમાં નોડલ એકાઉન્ટ શિફ્ટ થવાને કારણે સ્થિતિ સ્પષ્ટ થઈ ગઈ છે.
Paytmના આ પગલાથી 15 માર્ચ પછી પણ Paytm QR, સાઉન્ડબોક્સ અને કાર્ડ મશીન ચાલુ રહેશે. Paytm એ નિવેદનમાં જણાવ્યું છે કે કંપનીએ પહેલાની જેમ દુકાનદારો માટે સીમલેસ ટ્રાન્ઝેક્શન ચાલુ રાખવા માટે તેનું મુખ્ય એકાઉન્ટ એક્સિસ બેંક (એસ્ક્રો એકાઉન્ટ ખોલીને) ટ્રાન્સફર કર્યું છે.
RBIએ કહ્યું હતું કે જો Paytm PPBLને બદલે અન્ય બેંકો સાથે જોડાય છે, તો Paytm QR કોડ, Paytm Soundbox અથવા Paytm POS ટર્મિનલ જેવી સેવાઓ ચાલુ રહેશે. જો કે, 15 માર્ચ, 2024 પછી, ગ્રાહક ખાતાઓ, પ્રીપેડ સાધનો, વોલેટ્સ, ફાસ્ટેગ, નેશનલ કોમન મોબિલિટી કાર્ડ વગેરેમાં કોઈ વધુ થાપણો, ક્રેડિટ વ્યવહારો અથવા ટોપ-અપ્સને મંજૂરી આપવામાં આવશે નહીં.
