આવતીકાલથી આઇપીએલ સિઝન-17 સ્પર્ધાની શરૂઆત થવા જઇ રહી છે. અત્યાર સુધી રમાયેલી આ સ્પર્ધામાં ચેન્નાઇ સુપર કિંગ્ઝ અને મુંબઇ ઇન્ડીયન્સે પાંચ-પાંચ વખત ટાઇટલો જીતવાનો કીર્તિમાન નોંધાવ્યો છે. આ વખતે રોયલ ચેલેન્જર્સ બેંગ્લુરૂ પાસે પ્રથમ વખત ટાઇટલ જીતવાની સુવર્ણ તક છે. 2008થી આ સ્પર્ધામાં ભાગ લઇ રહેલી આ ટીમ એક પણ વખત આઇપીએલનું ટાઇટલ જીત્યુ નથી. અલબત આઇપીએલના મોટા ભાગના રેકોર્ડ બેંગ્લુરૂ ટીમના નામે અંકિત થયેલા છે. પરંતુ ટાઇટલ પ્રાપ્ત કરવામાં આ ટીમ નિષ્ફળ નીવડી છે.
ત્રણ વખત ચેમ્પિયન બનવાની તક આ ટીમે ગુમાવી છે. ત્રણ વખત આઇપીએલની ફાઇનલમાં પહોંચીને આ ટીમ દરેક વખતે હારનો સામનો કર્યો છે. 2009માં ડેકકન ચાર્જીસ સામે 6 રનથી બેંગ્લુરૂ ટીમ હારી હતી, ત્યારબાદ 2011માં ચેન્નાઇ સુપર કિંગ્ઝ 58 રનથી વિજય મેળવ્યો હતો. છેલ્લે 2016માં સનરાઇઝ હૈદ્રાબાદ સામે વિરાટ કોહલીના નેતૃત્વમાં આ ટીમ હારી હતી.
લીગ સ્ટેજમાં સર્વાધિક મેચો રમવાવાળી આ બીજી ટીમ છે. મુંબઇ ઇન્ડીયન્સે 247 મેચોમાંથી 140 મેચો મેચો જીતી છે, જયારે બેંગ્લુરૂની ટીમે 241 મેચોમાંથી 116 મેચોમાં વિજય મેળવ્યો છે. આ ટીમનો દેખાવ ગત વર્ષ દરમ્યાન નિરાશાજનક રહ્યો હતો. અને તે પ્લે ઓફમાં પણ નહોતી પહોંચી શકી ટીમે કુલ 14 મેચો રમી હતી. તેમાંથી 7 જીત અને 7 હાર સાથે છઠ્ઠા સ્થાને રહી હતી. વિરાટે 237 મેચોમાં 7263 રન 7 સદી સાથે અને ફાક ડુપ્લેસીસે 130 મેચોમાં 4133 રન બનાવ્યા છે.
જેમાં 33 અર્ધ સદીનો સમાવેશ થાય છે. તેનો શ્રેષ્ઠ સ્કોર 96 રનનો છે. 22 માર્ચના પ્રથમ મુકાબલો ચેમ્પીયન ચેન્નાઇ સાથે બેંગ્લુરૂનો થશે. ફાક ડુપ્લેસીસના નેતૃત્વમાં આ ટીમની નજર વિજય સાથે સ્પર્ધાની શરૂઆત કરવાની રહેશે. ધોની 2008માં આઇપીએલની પ્રથમ સ્પર્ધામાં ચેન્નાઇ સુપર કિંગ્ઝની ટીમ સાથે સુકાની તરીકે જોડાયો હત. અને ત્યારબાદ સતત ટીમનું નેતૃત્વ કરી રહ્યો છે. અલબત 2022માં ચેન્નાઇએ થોડા સમય માટે રવિન્દ્ર જાડેજાને સુકાની બનાવ્યો હતો પરંતુ અમુક મેચો પછી ધોનીએ ફરી ટીમનું સુકાન સંભાળ્યું હતું. હવે તેની નજર રેકોર્ડ છઠ્ઠુ ટાઇટલ પર છે. ચેન્નાઇએ છેલ્લી સિઝનમાં ગુજરાત ટાઇટનને હરાવીને ટાઇટલ કુલ પાંચમી વખત કબ્જે કર્યુ હતું.
