હરિયાણાના કૈથલમાં ચૂંટણી પંચની વેબસાઈટ હેક થઈ હોવાની સ્થિતિ બની છે. વાત જાણે એમ છે કે, અહીં આમ આદમી પાર્ટીના એક કાર્યકર્તાએ રેલીનું આયોજન કરવા માટે જિલ્લા વહીવટીતંત્ર પાસે વહીવટી પરવાનગી માંગી હતી. AAPની અરજી ફગાવી દેવામાં આવી હતી અને વાંધાજનક ભાષાનો ઉપયોગ કરવામાં આવ્યો હતો. આ સાથે બીજા સર્ટિફિકેટ પર હિરોઈનનો ફોટો લગાવીને અરજી રદ કરવામાં આવી હતી.આ બાબતની નોંધ લેતા જિલ્લા વહીવટીતંત્ર એઆરઓ બ્રહ્મા પ્રકાશે પાંચ કર્મચારીઓને તાત્કાલિક અસરથી સસ્પેન્ડ કરી દીધા છે અને આ બાબતની તપાસ માટે પોલીસને પત્ર લખ્યો છે.
કહેવામાં આવી રહ્યું છે કે આ પાસવર્ડ ઓફિસના કોઈ કર્મચારીએ બહાર શેર કર્યો છે અથવા તેણે જ આ કૃત્ય કર્યું છે. વિગતો મુજબ લોકસભા ચૂંટણીમાં આચારસંહિતાના પગલે, તમામ રાજકીય પક્ષોએ કોઈપણ રેલી અથવા સભાનું આયોજન કરતા પહેલા જિલ્લા વહીવટીતંત્ર પાસેથી ઓનલાઈન પરવાનગી લેવી પડશે. આ માટે ચૂંટણી પંચે ECore વેબસાઈટ પણ લોન્ચ કરી છે. જેની મદદથી આ સમગ્ર પ્રક્રિયા ચાલી રહી છે. ચૂંટણીને ધ્યાનમાં રાખીને જિલ્લા વહીવટી તંત્ર દ્વારા બે દિવસ પહેલા કર્મચારીઓને તાલીમ પણ આપવામાં આવી હતી.
