26 લોકસભા બેઠક અને 5 વિધાનસભાની બેઠક માટે આજથી ભરાશે ઉમેદવારી પત્રક

ગુજરાતમાં લોકસભા ચૂંટણીનું જાહેરનામુ 12મી એપ્રિલે બહાર પડશે અને આજથી ઉમેદવારીપત્રો ભરવાની પ્રક્રિયા શરૂ થશે, ઉમેદવારીપત્રની ચકાસણીથી લઇ પરત ખેંચવા સહિતની પ્રક્રિયા 22મી એપ્રિલ સુધી ચાલશે.રાજ્યમાં 26 લોકસભા બેઠક અને 5 વિધાનસભાની બેઠક માટે ઉમેદવારી પત્રક ભરાશે. ઉમેદવારી પત્રકો ભરવાનો અંતિમ દિવસ 19 એપ્રિલ રહેશે.
ઉમેદવારી ફોર્મ ભરતી વખતે ચૂંટણી અધિકારીની ચેમ્બરમાં ઉમેદવાર ઉપરાંત વધુમાં વધુ ચાર વ્યક્તિઓ હાજર રહી શકશે. જેમાં તેમના ટેકેદાર અને પ્રસ્તાવકર્તાઓનો પણ સમાવેશ થાય છે. જો કંકાસનો મુદ્દો ઉપસ્થિત થાય તો ઉમેદવાર સાથે ઉમેદવારીપત્ર ભરવા આવતા વાહનોનો ખર્ચ પણ ઉમેદવારના ખર્ચમાં ગણવામાં આવશે. 19મી એપ્રિલ સુધી ઉમેદવારી પત્રો ભરી શકાશે. તે પછી ઉમેદવારીપત્રોની ચકાસણી અને ઉમેદવારી પાછી ખેંચવાની પ્રક્રિયા રહેશે.
દેશભરમાં લોકસભાની ચૂંટણીની તારીખોની જાહેરાત કરવામાં આવી છે. આ સાથે જ ગુજરાતની 26 લોકસભા સીટ અને પાંચ વિધાનસભા બેઠકની ચૂંટણીની જાહેરાત પણ કરવામાં આવી છે. લોકસભાની ચૂંટણી 7 તબક્કામાં યોજાશે જ્યારે ચૂંટણીના પરિણામો 4 જૂને જાહેર થશે. દેશમાં 19 એપ્રિલે પહેલા તબક્કા સાથે મતદાનની શરુઆત થશે અને અંતિમ 7મા તબક્કાની ચૂંટણી 1 જૂનના રોજ યોજાશે. જ્યારે ગુજરાતની 26 બેઠકો માટે 7 મેના રોજ ત્રીજા તબક્કામાં મતદાન યોજાશે. 7 મેના રોજ ગુજરાતમાં પેટાચૂંટણી માટે પણ મતદાન યોજાશે.