ચૂંટણી પંચે મધ્યપ્રદેશના બેતુલમાં ચાર મતદાન મથકો પર ફરીથી મતદાન કરાવવાના આદેશો જારી કર્યા છે. બસમાં આગ લાગવાના કારણે આ મતદાન મથકોની સામગ્રી બળી ગઈ હતી. બસમાં 6 મતદાન મથકોની સામગ્રી હતી જેમાંથી 2 મતદાન મથકોની સામગ્રી સલામત રીતે બચાવી લેવામાં આવી હતી. ચૂંટણી પંચે બુધવારે આ અંગે આદેશ જારી કર્યો છે.
બેતુલના મુલતાઈ વિધાનસભા મતવિસ્તારના મતદાન મથક નંબર 275-રાજાપુર, મતદાન મથક નંબર 276 દુદર રૈયત, મતદાન મથક નંબર 279-કુંડા રૈયત અને મતદાન મથક નંબર 280-ચીખલીમાલમાં 10 મેના રોજ પુનઃ મતદાન યોજાશે. ચૂંટણી પંચ દ્વારા મુખ્ય ચૂંટણી અધિકારી, મધ્યપ્રદેશને આપવામાં આવેલા આદેશમાં કહેવામાં આવ્યું છે કે ચૂંટણીના નિયમો અનુસાર, 29-બેતુલ (ST) સંસદીય મતવિસ્તાર માટે સ્થિતિઓને ધ્યાનમાં લીધા પછી, મતદાન યોજવામાં આવશે. 7 મેના રોજ ચાર મતદાન મથકો પર મતદાન થયું હતું, જેને રદબાતલ ગણવામાં આવે છે અને શુક્રવાર, 10 મે, 2024ના રોજ ફરીથી મતદાન કરવામાં આવશે.
જિલ્લા ચૂંટણી અધિકારી કલેક્ટર બેતુલ નરેન્દ્ર કુમાર સૂર્યવંશીએ જણાવ્યું હતું કે મુલતાઈ વિધાનસભા મતવિસ્તારના 6 મતદાન કેન્દ્રોમાંથી મતદાન કર્મચારીઓને લઈ જતી બસમાં આગ લાગવાથી મતદાન સામગ્રી બળી ગઈ હતી, જેમાંથી 2 કેન્દ્રોની સામગ્રી સલામત છે અને 4 મતદાન મથકોની સામગ્રી બળી ગઈ હતી. અમે ચૂંટણી પંચને આ માહિતી આપી હતી, જેમાં પંચે 4 મતદાન મથકો પર પુનઃ મતદાનની જાહેરાત કરી હતી.
