ભારત સરકારે અમુક રોગોની સારવારમાં વપરાતી દવાઓના ભાવમાં રાહત આપવાનો નિર્ણય કર્યો છે. કેન્દ્ર સરકારે 41 દવાઓ અને 6 ફોર્મ્યુલેશનની કિંમતો નક્કી કરી છે. આ પછી સુગર, પેઈન, હાર્ટ, લીવર, એન્ટાસીડ, ઈન્ફેક્શન, એલર્જી, મલ્ટીવિટામીન, એન્ટીબાયોટીક્સની કિંમતો નક્કી કરવામાં આવી છે, જેના કારણે 41 દવાઓ સસ્તી થશે અને તમારે આ દવાઓ માટે વધુ ખર્ચ કરવો પડશે નહીં.
નેશનલ ફાર્માસ્યુટિકલ પ્રાઇસિંગ ઓથોરિટી ઓફ ઈન્ડિયા એટલે કે NPPAની 143મી બેઠકમાં આ નિર્ણય લેવામાં આવ્યો છે અને આ માટે ગેઝેટ નોટિફિકેશન બહાર પાડવામાં આવ્યું છે. NPPA એ એક સરકારી નિયમનકારી એજન્સી છે જે ભારતમાં ફાર્માસ્યુટિકલ દવાઓના ભાવને નિયંત્રિત કરે છે.
ભારતમાં ડાયાબિટીસના 10 કરોડથી વધુ દર્દીઓ છે અને વિશ્વમાં ડાયાબિટીસના સૌથી વધુ દર્દીઓ ધરાવતા દેશોમાં ભારત પણ આગળ છે. દેશમાં ડાયાબિટીસ સામાન્ય બની ગયો છે અને દવાઓ અને ઇન્સ્યુલિન પર નિર્ભર એવા ઘણા દર્દીઓ માટે આ નવા સમાચાર કેટલાક કામના સાબિત થઈ શકે છે.
સામાન્ય રીતે ચેપ અને એલર્જી સિવાય આ મલ્ટીવિટામિન્સ અને એન્ટીબાયોટિક્સની કિંમતો ઉંચી હોય છે જેના કારણે સામાન્ય સારવારનો ખર્ચ પણ વધું થઈ જાય છે. આથી સામાન્ય લોકોને આ 41 દવાઓ સસ્તી થવાથી રાહત મળશે. આ વર્ષે ફેબ્રુઆરીમાં પણ NPPAએ ડાયાબિટીસ અને હાઈપરટેન્શન બંનેમાં વપરાતી 69 દવાઓની કિંમતોમાં ઘટાડો કર્યો હતો. NPPAએ આ રોગોમાં વપરાતી 69 દવાઓના ફોર્મ્યુલેશનની છૂટક કિંમત નક્કી કરી હતી અને 31 ફોર્મ્યુલેશનની દવાઓની કિંમતો નક્કી કરી હતી.
