એશિયાઈ જિમ્નાસ્ટીક ચેમ્પિયન્સશીપમાં ભારતને પહેલી વખત ગોલ્ડ

ટોચની જિમ્નાસ્ટ દીપા કર્માકર રવિવારે એશિયન સિનિયર ચૅમ્પિયનશિપમાં ગોલ્ડ મેડલ જીતનારી પ્રથમ ભારતીય બની છે. દીપા કર્માકરે અહીં મહિલા વૉલ્ટ ઇવેન્ટમાં ગોલ્ડ મેડલ જીત્યો છે. 30 વર્ષની દીપાએ ઉઝબેકિસ્તાનની રાજધાનીમાં છેલ્લા દિવસે વોલ્ટ ફાઇનલમાં 13.566ની એવરેજ હાંસલ કરી છે.. ઉત્તર કોરિયાના કિમ સોન હ્યાંગ (13.466) અને જો ક્યોંગ બ્યોલે (12.966) અનુક્રમે સિલ્વર અને બ્રોન્ઝ મેડલ જીત્યા છે.
2016 રિયો ઓલિમ્પિકમાં વોલ્ટ ફાઇનલમાં ચોથું સ્થાન મેળવનારી દીપાએ 2015ની આવૃત્તિમાં આ જ ઇવેન્ટમાં બ્રોન્ઝ મેડલ જીત્યો હતો. આશિષ કુમારે 2015 એશિયન ચેમ્પિયનશિપમાં વ્યક્તિગત ફ્લોર એક્સરસાઇઝમાં બ્રોન્ઝ મેડલ જીત્યો હતો. પ્રણતિ નાયકે 2019 અને 2022ની આવૃત્તિમાં વોલ્ટ ઈવેન્ટમાં બ્રોન્ઝ મેડલ પણ જીત્યો હતો.