હોકી ઈન્ડિયાએ બુધવારે પેરિસ ઓલિમ્પિક માટે 16 સભ્યોની ભારતીય મેન્સ હોકી ટીમની જાહેરાત કરી હતી. ટીમની કમાન હરમનપ્રીત સિંહને સોંપવામાં આવી છે જ્યારે મિડફિલ્ડર હાર્દિક સિંહને ટીમનો વાઇસ કેપ્ટન બનાવવામાં આવ્યો છે.
હરમનપ્રીતના નેતૃત્વમાં ટીમ ઈન્ડિયા 26 જુલાઈથી 11 ઑગસ્ટ સુધી યોજાનારી પેરિસ ઓલિમ્પિકમાં ભાગ લેશે. હરમનપ્રીતની આ ત્રીજી ઓલિમ્પિક હશે. અનુભવી ખેલાડીઓની સાથે 5 યુવા ખેલાડીઓને પણ ટીમમાં સ્થાન આપવામાં આવ્યું છે, જેઓ ઓલિમ્પિકમાં ડેબ્યૂ કરશે.
ભારતીય મેન્સ હોકી ટીમ 27 જુલાઈએ ન્યૂઝીલેન્ડ સામે તેના અભિયાનની શરૂઆત કરશે. ભારતને પૂલ-Bમાં મૂકવામાં આવ્યું છે. ભારતીય ટીમને ટુર્નામેન્ટના પૂલ-Bમાં રાખવામાં આવી છે. ટીમ ઈન્ડિયા બેલ્જિયમ, આર્જેન્ટિના, ન્યૂઝીલેન્ડ, ઓસ્ટ્રેલિયા અને આયર્લેન્ડની સાથે પૂલ-Bમાં છે. જ્યારે પૂલ-Aમાં નેધરલેન્ડ્સ, સ્પેન, જર્મની, ફ્રાન્સ, ગ્રેટ બ્રિટન અને સાઉથ આફ્રિકાનો સમાવેશ થાય છે.
ટીમ ગ્રૂપ સ્ટેજમાં એક વખત એકબીજા સામે ટકરાશે. દરેક પૂલમાંથી ટૉપ-4 ટીમ ક્વાર્ટર ફાઈનલમાં પ્રવેશ કરશે. પેરિસ-2024 ઓલિમ્પિક હોકી મેડલ રાઉન્ડની મેચ 8 ઑગસ્ટના રોજ નક્કી કરવામાં આવી છે.
