ઠગબાજો દ્વારા અવનવી રીતે લોકોને ધૂતવામાં આવતાં હોય છે. આવી ઠગાઈનો એક નવો કિસ્સો સામે આવ્યો છે. છત્તીસગઢના બિલાસપુરમાંથી છેતરપિંડીનો એક ચોંકાવનારો કિસ્સો સામે આવ્યો છે. જ્યાં એક સોફ્ટવેર એન્જિનિયર ડ્રીમગર્લના પ્રેમમાં છેતરપિંડીનો શિકાર બન્યો હતો. આરોપીઓએ તેની સાથે 1 કરોડ 40 લાખ રૂપિયાની છેતરપિંડી કરી હતી. મિમિક્રી આર્ટિસ્ટે છોકરીનો અવાજ કાઢીને એન્જિનિયરને ફોન કર્યો અને તેને પ્રેમની વાતોમાં ફસાવીને લગ્ન કરવાનું વચન આપ્યું અને પછી મહિલાના અવાજમાં બ્લેકમેલ કરીને જુદી જુદી રીતે 1.40 કરોડ રુપિયા કઢાવી લીધાં હતા.
પીડિત સોફ્ટવેર એન્જિનિયર રોહિત જૈને પોલીસને પોતાની ફરિયાદમાં જણાવ્યું કે તે મધ્યપ્રદેશના મૈહરનો રહેવાસી છે. તે લગ્ન કરવા માટે છોકરી શોધી રહ્યો હતો. આ દરમિયાન તેની મુલાકાત નીતિન જૈન નામના યુવક સાથે થઈ હતી. બંનેએ વાત કરવાનું શરૂ કર્યું અને મિત્ર બની ગયા. નીતિનને ખબર પડી કે રોહિત જૈન લગ્ન માટે છોકરી શોધી રહ્યો છે. માત્ર આનો ફાયદો ઉઠાવીને આરોપીએ રોહિતનો સંપર્ક કર્યો અને તેને લગ્ન માટે સારી છોકરી સાથે પરિચય કરાવવા કહ્યું. નિતિને કેટલીક છોકરીઓના ફોટા રોહિતને મોકલ્યા હતા. જેમાં રોહિતને લગ્ન માટે એકતા જૈન નામની યુવતી પસંદ પડી હતી.
આ પછી નીતિન જૈને યુવતીનો અવાજ કાઢ્યો અને રોહિત સાથે એક બનીને વાત કરવાનું શરૂ કર્યું. બંને કલાકો સુધી ફોન પર વાત કરવા લાગ્યા. આરોપીએ થોડા દિવસો સુધી યુવતીના અવાજમાં વાત કરી અને તેની સાથે લગ્ન કરવા રાજી થયા બાદ તેણે છેતરપિંડી શરૂ કરી. આરોપીઓએ એકતા બીમાર હોવાના અને અન્ય જરૂરિયાતો હોવાના બહાને રોહિત પાસેથી આશરે રૂ. 30 લાખ અલગ-અલગ બેંક ખાતામાં જમા કરાવ્યા હતા. આ પછી આરોપીએ નવું સિમકાર્ડ ખરીદ્યું અને કથિત એકતા જૈનના ભાઈ અંશુલ જૈન તરીકે ઓળખાતા નવા અવાજમાં રોહિતનો સંપર્ક કર્યો. તેણે તેની બહેન સાથે લગ્ન કરવા માટે પરિવારની સંમતિ આપી. વાતચીત દરમિયાન, અરજદારને શેરબજારમાં નુકસાન, પ્રોપર્ટી ટેક્સ ભરવા અને કૌટુંબિક વિવાદોને ટાંકીને વિવિધ બેંક ખાતામાં આશરે રૂ. 30 લાખ જમા કરાવવાનું કહેવામાં આવ્યું હતું. આ કામ કરતી વખતે તેઓએ સોફ્ટવેર એન્જિનિયર રોહિત સાથે 1 કરોડ 40 લાખ રૂપિયાની છેતરપિંડી કરી હતી.
