વડાપ્રધાન નરેન્દ્ર મોદીની અધ્યક્ષતામાં મળેલી કેન્દ્રીય મંત્રીમંડળની બેઠકે ઇન્ડિયા સેમિકંડક્ટર મિશન અંતર્ગત સાણંદમાં વધુ એક સેમિકંડક્ટર યુનિટની સ્થાપનાની મંજૂરી આપી છે. આ પ્લાન્ટ કેયન્સ સેમિકોન પ્રાઇવેટ લિમિટેડ દ્વારા રૂપિયા 3300 કરોડના સૂચિત રોકાણ સાથે સ્થપાશે. રોજની 60 લાખ ચિપ્સનું ઉત્પાદન થવાની ક્ષમતા સાથેનો આ પ્લાન્ટ બનશે.
મુખ્યમંત્રી ભૂપેન્દ્ર પટેલે ગુજરાતમાં વાઇબ્રન્ટ સેમિકન્ડક્ટર ઇકોસિસ્ટમના નિર્માણને વેગ આપવાની પ્રતિબદ્ધતા સાથે વડાપ્રધાન મોદીએ આપેલી આ વધુ એક પ્લાન્ટની ભેટ માટે સમગ્ર ગુજરાત વતી તેમનોહૃદયપૂર્વક આભાર વ્યક્ત કર્યો છે.
મુખ્યમંત્રીએ જણાવ્યું હતું કે ગુજરાત સેમિકન્ડક્ટર હબ બનવાની દિશામાં વડાપ્રધાન નરેન્દ્રભાઈ મોદીની લીડરશિપમાં ઝડપભેર આગળ વધી રહ્યું છે. આ હેતુસર 2023માં સાણંદમાં માઇક્રોનના પ્રથમ સેમિકન્ડક્ટર પ્લાન્ટની સ્થાપના માટે તેમણે આપેલી મંજૂરી આપી હતી. એ બાદ તેમણે ફેબ્રુઆરી 2024માં ધોલેરામાં ટાટા ઇલેક્ટ્રોનિક્સના સેમિકન્ડક્ટર પ્લાન્ટ માટે અને સી.જી. પાવરને સાણંદમાં આ પ્રકારના પ્લાન્ટ માટે મંજૂરી આપી છે. હવે કેયન્સ સેમિકંડક્ટર પ્રાઇવેટ લિમિટેડ દ્વારા ગુજરાતનો આ ચોથો પ્લાન્ટ સાણંદમાં સ્થપાશે. આના પરિણામે રોજગારીની તકો પણ વ્યાપક બનશે.
અમેરિકન માઇક્રોચિપ મેન્યુફેક્ચરિંગ જાયન્ટ માઇક્રોન કંપની સાણંદમાં પ્લાન્ટ નાખશે. આ માટે ઓગસ્ટ-2023માં મુખ્યમંત્રી ભૂપેન્દ્ર પટેલની હાજરીમાં એમઓયુ થયા હતા. આ એમઓયુ થયા એ પહેલાં જુલાઈ-2023માં વડાપ્રધાન નરેન્દ્ર મોદી અમેરિકા ગયા હતા અને ત્યાં માઈક્રોન કંપનીએ ગુજરાતમાં પ્લાન્ટ નાખવાની જાહેરાત કરી હતી. માઈક્રોન કંપનીને કુલ રોકાણની 20 ટકા મદદ ગુજરાત સરકાર કરશે. માઇક્રોને ગુજરાતમાં 22 હજાર કરોડ રૂપિયા જેટલા રોકાણની જાહેરાત કરી છે. આ માટે બે તબક્કામાં પ્લાન્ટ તૈયાર થશે અને ગુજરાતમાં આ બન્ને તબક્કામાં દસ હજાર જોબ ઊભી થશે. પહેલા તબક્કાનું કામ 2024ના અંત સુધીમાં પૂરું કરી દેવાશે અને બીજા તબક્કાનું કામ 2025માં શરૂ કરીને 2027માં પૂરું કરી દેવાશે.
બધાં જ મિશન મળીને અંદાજે 1.50 લાખ કરોડના રોકાણ સાથે પ્રતિદિન 7 કરોડ ચિપ્સનું ઉત્પાદન થવાની સંભાવના
કેન્દ્ર સરકારે ભારતમાં સેમિકંડક્ટર અને ડિસ્પ્લે મેન્યુફેક્ચરિંગ ઇકોસિસ્ટમને વેગ આપવા રૂપિયા 76 હજાર કરોડની જોગવાઈ સાથે ઇન્ડિયા સેમિકંડક્ટર મિશન કાર્યરત કરેલું છે. અત્યારસુધીમાં આ મિશન અન્વયે ગુજરાતમાં 3 અને આસામમાં 1 એમ 4 પ્રોજેક્ટસ સ્થાપવાની કામગીરી વેગવંતી બને છે. આ બધાં જ મિશન મળીને અંદાજે 1.50 લાખ કરોડના રોકાણ સાથે પ્રતિદિન 7 કરોડ ચિપ્સનું ઉત્પાદન થવાની સંભાવના છે.
