નવા ઉચ્ચ રેકોર્ડ સાથે સપ્તાહની શરૂઆત કર્યા બાદ આજે મંગળવારે સ્થાનિક શેરબજાર તેજીના માર્ગ પર છે. રેકોર્ડ હાઈ લેવલને કારણે માર્કેટમાં પ્રોફિટ બુકિંગનું દબાણ દેખાતું હતું, જેના કારણે બંને મુખ્ય સૂચકાંકો BSE સેન્સેક્સ અને NSE નિફ્ટીએ લાલ નિશાનમાં ટ્રેડિંગ શરૂ કર્યું હતું. જોકે, થોડા જ સમયમાં માર્કેટમાં શાનદાર વાપસી થઈ. બોમ્બે સ્ટોક એક્સચેન્જના સેન્સેક્સમાં વધારો થયો અને તે 85,041.34 ની ઓલ ટાઈમ હાઇ સપાટી પર પહોંચી ગયો હતો. આ પહેલીવાર છે જ્યારે સેન્સેક્સ 85,000ના આંકને વટાવી ગયો છે. નિફ્ટી પણ 26000ની નજીક ટ્રેડ કરી રહ્યો છે.
સવારે 9:15 કલાકે સેન્સેક્સ મામૂલી ઘટાડા સાથે 84,860 પોઈન્ટ પર ખુલ્યો હતો. નિફ્ટીની શરૂઆત 18 પોઈન્ટના મામૂલી ઘટાડા સાથે 25,921.45 પોઈન્ટ પર થઈ હતી. કેટલાક ટૂંકા કારોબારમાં સેન્સેક્સ 150 પોઈન્ટ્સ તૂટ્યો હતો. સવારે 9:25 વાગ્યે સેન્સેક્સ લગભગ 80 પોઈન્ટના ઘટાડા સાથે 84,850 પોઈન્ટની નજીક ટ્રેડ થઈ રહ્યો હતો. જ્યારે NSEનો નિફ્ટી 50 ઈન્ડેક્સ લગભગ 10 પોઈન્ટના ઘટાડા સાથે 25,925 પોઈન્ટની નજીક હતો.
સોમવારે અમેરિકન બજારો મજબૂત બંધ થયા હતા. વોલ સ્ટ્રીટ પર, ડાઉ જોન્સ ઇન્ડસ્ટ્રીયલ એવરેજ 0.15 ટકાના નજીવા વધારા સાથે બંધ થયો. એસએન્ડપી 500 ઇન્ડેક્સમાં 0.28 ટકા અને ટેક ફોકસ્ડ ઇન્ડેક્સ Nasdaqમાં 0.14 ટકાનો નજીવો વધારો થયો હતો. આજે મંગળવારે એશિયન માર્કેટમાં પણ વધારો જોવા મળી રહ્યો છે. જાહેર રજા પછી ખુલેલ જાપાનનો નિક્કી 1.47 ટકા અને ટોપિક્સ 1 ટકા ઉપર છે. દક્ષિણ કોરિયાનો કોસ્પી 0.6 ટકા અને કોસ્ડેક 0.68 ટકાના વધારામાં છે. હોંગકોંગનો હેંગસેંગ ઈન્ડેક્સ 2.18 ટકા અને મેઈનલેન્ડ ચીનનો શાંઘાઈ કમ્પોઝિટ 1 ટકા મજબૂત છે.
