લદ્દાખના સામાજિક કાર્યકર્તા સોનમ વાંગચુક અને તેના સાથીદારોને દિલ્હી પોલીસે જંતર-મંતર પર ઉપવાસ કરવાની મંજૂરી આપી ન હતી. સોનમે રવિવારે સવારે એક પોસ્ટમાં કહ્યું – એક અસ્વીકાર, બીજી નિરાશા. આખરે આજે સવારે અમને વિરોધ માટે અધિકૃત રીતે નિયુક્ત સ્થળ માટે આ અસ્વીકાર પત્ર મળ્યો.
સોનમે કહ્યું- અમે ઔપચારિક સ્થળે શાંતિપૂર્ણ રીતે ઉપવાસ કરવા માંગતા હતા. પરંતુ છેલ્લા 2-3 દિવસથી અમને આવી કોઈ જગ્યા આપવામાં આવી નથી. અમને લદ્દાખ ભવનમાં નજરકેદ કરવામાં આવ્યા છે. અમે અહીંથી ઉપવાસ કરી રહ્યા છીએ. અમારા સેંકડો લોકો લેહથી દિલ્હી આવ્યા છે. તેમાં મહિલાઓ, ભૂતપૂર્વ સૈનિકો અને 75 વર્ષથી વધુ ઉંમરના લોકોનો સમાવેશ થાય છે. અમે બધા લદ્દાખ ભવન ખાતે અનિશ્ચિત સમયના ઉપવાસ પર બેસીશું. સોનમ અને તેની સાથે હાજર લોકો લદ્દાખને સંપૂર્ણ રાજ્ય બનાવવા, સ્થાનિક લોકોને નોકરીઓમાં આરક્ષણ, લેહ અને કારગિલ માટે એક-એક સંસદીય બેઠક અને બંધારણની છઠ્ઠી સૂચિને લાગુ કરવાની માંગ કરી રહ્યા છે. 30 દિવસની પગપાળા યાત્રા બાદ 30 સપ્ટેમ્બરની રાત્રે તેઓ દિલ્હી પહોંચ્યા હતા.
