આખું વર્ષ ફટાકડા પર પ્રતિબંધ કેમ ના લાગી શકે? : સુપ્રીમ કોર્ટ

સુપ્રીમ કોર્ટે સોમવારે દિલ્હી સરકારને કહ્યું કે દિલ્હીમાં વર્ષભર માટે ફટાકડા પર 25 નવેમ્બર પહેલાં નિર્ણય લો. દિલ્હી સરકારના વકીલે કોર્ટ સમક્ષ કહ્યું હતું કે અમે તમામ સંબંધિત વિભાગો સાથે ચર્ચા કર્યા બાદ આખા વર્ષ માટે ફટાકડા પર પ્રતિબંધ લાગુ કરવાનો નિર્ણય લઈશું.
જસ્ટિસ અભય ઓક અને જસ્ટિસ ઑગસ્ટિન જ્યોર્જ મસીહની સુપ્રીમ કોર્ટની બેન્ચે દિલ્હી પોલીસને કહ્યું, “દિલ્હી પોલીસ દ્વારા પ્રતિબંધોને ગંભીરતાથી લાગુ કરવામાં આવ્યા નથી.” કોર્ટે કહ્યું કે દિલ્હી પોલીસ કમિશનરે ફટાકડા પર પ્રતિબંધ મૂકવા માટે એક વિશેષ સેલ બનાવવો જોઈએ. દિલ્હી સરકારને 25 નવેમ્બર પહેલા ફટાકડા પર કાયમી પ્રતિબંધનો નિર્ણય લેવાનો નિર્દેશ આપ્યો છે.
સુનવણી દરમિયાન બેન્ચે કહ્યું હતું કે કોઈપણ ધર્મ પ્રદૂષણનું કારણ બને તેવી કોઈપણ પ્રવૃત્તિને પ્રોત્સાહન આપતું નથી. જો આ રીતે ફટાકડા ફોડવામાં આવે છે, તો તે નાગરિકોના સ્વાસ્થ્યના મૂળભૂત અધિકારને પણ અસર કરે છે. પ્રદૂષણ મુક્ત વાતાવરણમાં જીવવું એ મૂળભૂત અધિકાર છે. કોર્ટે ફટાકડા પર પ્રતિબંધ લાગુ કરવાની રીત પર અસંતોષ વ્યક્ત કર્યો હતો. બેન્ચે કહ્યું કે 14 ઓક્ટોબરે દિલ્હી સરકારના પ્રતિબંધના આદેશને પોલીસે ગંભીરતાથી લીધો નથી. દિલ્હી પોલીસે ફટાકડાનું વેચાણ તાત્કાલિક બંધ કરવા માટે તમામ લાઇસન્સધારકોને જાણ કરવી જોઈએ.
કોર્ટે કહ્યું કે દિલ્હી પોલીસે તરત જ તે સંગઠનોને માહિતી આપવી જોઈએ જે ઓનલાઈન ફટાકડા વેચે છે. તેમણે રાજધાની દિલ્હીની હદમાં ફટાકડા વેચવાનું બંધ કરવું જોઈએ. પોલીસ કમિશનરે ખાતરી કરવી જોઈએ કે તમામ સ્થાનિક પોલીસ સ્ટેશનના સ્ટેશન ઈન્ચાર્જ સમગ્ર વર્ષ દરમિયાન ફટાકડા પરના પ્રતિબંધના અમલ માટે જવાબદાર રહેશે.