વાવ વિધાનસભા પેટાચૂંટણીનું મતદાન શરૂ

બનાસકાંઠાની વાવ વિધાનસભાની પેટા ચૂંટણીનું આજે મતદાન છે. સવારે 7 વાગ્યાથી મતદાન શરૂ થયું છે જે સાંજે 6 વાગ્યા સુધી થશે. મતદાન શાંતિપૂર્ણ માહોલમાં થાય અને મતદારોને કોઈ મુશ્કેલી ન પડે તે માટે ચૂંટણીપંચે તમામ વ્યવસ્થા કરી છે. મતદાન કેન્દ્રો પર વહેલી સવારથી જ મતદાતાઓની લાંબી લાંબી લાઈનો જોવા મળી રહી છે. આ બેઠક પર રસાકસીનો જંગ જામ્યો છે.
વાવમાં મતદાન માટે 331 મતદાન મથકો ઉભા કરાયા છે. જેમાં 97 સંવેદનશીલ કેન્દ્રો સામેલ છે. આ વખતે વાવ વિધાનસભા બેઠક પર 3 લાખ 10 હજાર 681 મતદારો નોંધાયા છે. મતદાન માટે 1400થી વધુ કર્મચારીઓ તૈનાત કરાયા છે.. જ્યારે 1500 જેટલા પોલીસ સ્ટાફ સાથે 04 ડીવાયએસપી..08 પીઆઇ અને 30 પીએસઆઇ સહીતનો કાફલો ખડેપગે છે. કુલ 10 ઉમેદવારોએ વાવની ચૂંટણીમાં ઝંપલાવ્યું છે. વાવની પેટાચૂંટણીના જંગમાં ત્રિપાંખીયો મુકાબલો જામ્યો છે. જેમાં ભાજપ, કોંગ્રેસ અને અપક્ષ વચ્ચે કાંટાની ટક્કર છે. બંન્ને મુખ્ય પક્ષ સહિત 10 જેટલા ઉમેદવારો ચૂંટણીના મેદાનમાં છે.