બાંગ્લાદેશમાં હિન્દુઓ પર સતત થઈ રહેલા હુમલાના વિરોધમાં પશ્ચિમ બંગાળના કેટલાક ડોક્ટરોએ બાંગ્લાદેશી દર્દીઓની સારવાર કરવાનો ઈન્કાર કરી દીધો છે. ડો.શેખર બંદોપાધ્યાયે સિલીગુડીમાં પોતાના ખાનગી ક્લિનિકમાં તિરંગો લગાવ્યો છે. ડોક્ટરે ધ્વજ સાથે મેસેજમાં લખ્યું- ભારતનો રાષ્ટ્રધ્વજ આપણી માતા જેવો છે. ચેમ્બરમાં પ્રવેશતા પહેલા તિરંગાને સલામી આપો. ખાસ કરીને બાંગ્લાદેશી દર્દીઓ, જો તેઓ સલામ નહીં કરે તો તેમને અંદર આવવા દેવામાં આવશે નહીં.
ડૉ. શેખર બંદોપાધ્યાય ઉત્તર બંગાળ મેડિકલ કૉલેજ હોસ્પિટલમાં ઇએનટી વિભાગમાં વિશેષ તબીબી અધિકારી તરીકે કામ કરે છે. તેમણે કહ્યું- મને એ જોઈને દુઃખ થયું છે કે બાંગ્લાદેશમાં આપણા રાષ્ટ્રધ્વજનું અપમાન થઈ રહ્યું છે. એક ડૉક્ટર તરીકે હું દર્દીઓને દૂર કરવા માંગતો નથી, પરંતુ જે લોકો મારા દેશમાં આવે છે તેઓએ આપણા ધ્વજ, આપણી માતૃભૂમિનું સન્માન કરવું જોઈએ. એવું લાગે છે કે બાંગ્લાદેશ તાલિબાની માનસિકતામાં સરકી ગયું છે.
અન્ય એક ડૉક્ટર, જનરલ સર્જન અને બાળ નિષ્ણાત ચંદ્રનાથ અધિકારીએ જાહેરાત કરી છે કે તેઓ તેમના ખાનગી ક્લિનિકમાં કોઈપણ બાંગ્લાદેશી દર્દીની સારવાર કરશે નહીં. ડૉક્ટરે કહ્યું, હું બોલપુરની સરકારી હોસ્પિટલમાં જોડાયેલ છું. ત્યાં, હું કોઈ દર્દીને ના પાડી શકતો નથી, પરંતુ મને મારા ક્લિનિકમાં આવું કરવાની સ્વતંત્રતા છે. મેં નક્કી કર્યું છે કે હું બાંગ્લાદેશના દર્દીઓને જોઈશ નહીં. મારો દેશ પ્રથમ આવે છે. બાંગ્લાદેશમાં જે થઈ રહ્યું છે તે આપણા બધા માટે ગંભીર ચિંતાનો વિષય છે.
પશ્ચિમ બંગાળના કોલકાતા અને ત્રિપુરાના અગરતલામાં બે હોસ્પિટલોએ પહેલાથી જ બાંગ્લાદેશી દર્દીઓની સારવાર કરવાનો ઇનકાર કરી દીધો છે. કોલકાતાની જેએન રે હોસ્પિટલના સુભ્રાંશુ ભક્તાએ કહ્યું- હવે બાંગ્લાદેશી દર્દીઓની સારવાર નહીં થાય કારણ કે બાંગ્લાદેશમાં તિરંગાનું અપમાન થઈ રહ્યું છે. ભારતે તેમની આઝાદીમાં મહત્વની ભૂમિકા ભજવી હતી, તેમ છતાં અમે તેમની વચ્ચે ભારત વિરોધી ભાવનાઓ જોઈ રહ્યા છીએ. ત્રિપુરાના અગરતલામાં ILS હોસ્પિટલની સામે કેટલાક લોકોએ બાંગ્લાદેશ વિરુદ્ધ વિરોધ પ્રદર્શન કર્યું હતું. આ પછી હોસ્પિટલ મેનેજમેન્ટે બાંગ્લાદેશી દર્દીઓની સારવાર ન કરવાનો નિર્ણય લીધો હતો.
