7 લાખ કરોડનું ડ્રગ્સ જપ્ત; 400થી વધુ લોકોની ધરપકડ

વિશ્વના ડ્રગ્સ ઝડપવાના સૌથી મોટા ઓપરેશનમાં કોલંબિયાની આગેવાનીમાં કરાયેલા ઓપરેશનમાં 1400 ટન ડ્રગ્સ ઝડપી લેવાયું છે. આ ડ્રગ્સની બજાર કિંમત 85 અબજ ડોલર (લગભગ 7.14 લાખ કરોડ) છે. છ અઠવાડિયા સુધી ચાલેલા ઓપરેશનના અંતે કોલંબિયન નાર્કોટિક્સ બ્યુરોની આગેવાનીમાં આંતરરાષ્ટ્રીય સત્તાવાળાઓએ 128 ટન મારીજુઆના અને 225 ટન કોકેઇન સહિત 1400 ટન ડ્રગ્સ ઝડપ્યું છે.
ડ્રગ્સના જથ્થા સાથે 400 કરતાં વધારે લોકોની ધરપકડ કરવામાં આવી છે. કોલંબિયન સત્તાવાળાઓએ કોકેઇન અને મારીજુઆના સિવાય બીજા ક્યા ડ્રગ્સ ઝડપાયાં તેની વિગતો બહાર પાડી નથી પણ કોકેઇન કરતાં પણ મોંઘા ડ્રગ્સનો મોટો જથ્થો ઝડપાયો હોવાનું તેમણે સ્વીકાર્યું છે. આ ડ્રગ્સ છ સેમી સબમર્સિબલ વેસલ્સમાં ભરીને દક્ષિણ અમેરિકાથી ઓસ્ટ્રેલિયા લઇ જવાતું હતું. કોલંબિયાના પેસિફિક દરિયાકાંઠે આવેલા બંદર શહેર તુમાકોથી આ બોટ ઓસ્ટ્રેલિયા જવા રવાના થઇ ત્યારથી તેના પર સત્તાવાળાઓની નજર હતી. 1 ઓક્ટોબરથી 14 નવેમ્બર સુધી ચાલેલા ઓપરેશન દરમિયાન પકડાયેલા ડ્રગ્સની કિંમત ગણવામાં જ 15 દિવસનો સમય લાગી ગયો છે.
‘ઓપરેશન ઓરિયન’ નામના છ સપ્તાહના ઓપરેશન માટે અમેરિકા, ઓસ્ટ્રેલિયા, બ્રાઝિલ, સ્પેન, નેધરલેન્ડ સહિતના દેશોએ હાથ મિલાવ્યા હતા. આ દેશોનાં હેલિકોપ્ટર્સ, ફાઇટર પ્લેન અને ફ્રીગેટ્સને કામે લગાડાઇ હતી. ડ્રગ્સની વૈશ્વિક બજારમાં અલગ અલગ કિંમતો છે તેથી પકડાયેલા ડ્રગ્સની કિંમત વિશે અલગ અલગ અહેવાલો છે પણ કોલંબિયન સત્તાવાળાઓએ ડ્રગ્સની કિંમત 85 અબજ ડોલર હોવાની વાતને સમર્થન આપ્યું છે. ખુદ કોલંબિયાના રાષ્ટ્રપતિ ગુસ્તાવો પેટ્રોએ કહ્યું કે કોલંબિયા દ્વારા ઇતિહાસમાં કોકેઇનનો આ સૌથી મોટો જથ્થો ઝડપાયો છે. ઓસ્ટ્રેલિયામાં એક કિલોગ્રામ કોકેઇન 2.40 લાખ ડોલર (લગભગ રૂપિયા 20 કરોડ) સુધઈના ભાવે વેચાય છે. અમેરિકામાં કોકેઇનની કિંમત કરતાં ઓસ્ટ્રેલિયામાં કોકેઇનની કિંમત ત્રણથી છ ગણી વધારે છે.
છ અઠવાડિયા સુધી ચાલેલા ઓપરેશન ઓરિયનમાં ડ્રગ્સ લઇને 6 કોલંબિયન સબ મર્સિબલ વેસલ ઓસ્ટ્રેલિયા જવા રવાના થયાં ત્યારથી તેમના પર નજર રખાઇ હતી. ડ્રગ્સ માફિયા ચાલાકી વાપરીને ડ્રગ્સની હેરાફેરી માટે વપરાતા પરંપરાગત રૂટથી અલગ રૂટ પર ડ્રગ્સ લઇ જઇ રહ્યા હતા પણ નેવી અને એરફોર્સના વિમાનોની મદદથી તેમના પર સતત નજર રાખીને છેવટે મધદરિયે તેમને ઝડપી લેવાયાં હતાં.