ધરતીથી 12 કિમી ઊંચાઈએ 300ની ઝડપે ફૂંકાતી જેટ સ્ટ્રીમે ઠંડી વધારી

શિયાળામાં કચ્છ સહિત સમગ્ર ઉત્તર ભારતમાં કોલ્ડ વેવ વેસ્ટર્ન ડિસ્ટર્બન્સને કારણે ફરી વળતી હોય છે. આ વર્ષે પણ વેસ્ટર્ન ડિસ્ટર્બન્સના લીધે કચ્છ સહિત સમગ્ર ઉત્તર ભારત ઠંડીની અસર હેઠળ છે. નલિયામાં પારો 4 દિવસથી સિંગલ ડિજિટમાં છે. જોકે વેસ્ટર્ન ડિસ્ટર્બન્સની સાથે કચ્છ સહિત સમગ્ર ઉત્તરભારતના અાકાશમાં 12 કિમી ઉપરથી અંદાજે 300 કિમી પ્રતિ કલાકની ઝડપથી સુસવાટા મારતી જેટસ્ટ્રીમના લીધે પણ ઠંડીની અસર વધી છે.
વેસ્ટર્ન ડિસ્ટર્બન્સ છેક ભુમધ્ય સાગરમાંથી ઉઠતી એક હવા પ્રણાલી છે. ઉત્તરીય ઠંડા અને દક્ષિણ ભાગમાંથી આવતા સહારાના રણ સહિત આફ્રિકાના પવનો ભુમધ્ય સાગરમાં ટકરાય છે ત્યારે વેસ્ટર્ન ડિસ્ટર્બન્સ સર્જાય છે. જે પશ્ચિમથી પૂર્વ તરફ ગતિ કરે છે. સામાન્ય રીતે જેટ સ્ટ્રીમની ભારતીય ગોળાર્ધમાં ઓક્ટોબર અને નવેમ્બરમાં અસર વધારે હોય છે. જોકે હાલ 12 કિમી ઊંચાઇએથી જે ઝડપે આ હવા વહી રહી છે તેનાથી વેસ્ટર્ન ડિસ્ટર્બન્સને આગળ વધવામાં મદદ મળી રહી છે. જેટ સ્ટ્રીમની હવા નીચે પશ્ચિમી વિક્ષોભ સાથે ભળતા ઠંડીનું જોર વધી રહ્યું છે.