ગુરુવારે દેશના 18 રાજ્યોમાં ધુમ્મસનું એલર્ટ જાહેર કરવામાં આવ્યું છે. ઠંડા પવનોને કારણે મધ્યપ્રદેશ ધ્રૂજી રહ્યું છે. ઘણા શહેરોમાં રાત્રિનું તાપમાન 7 ડિગ્રીથી નીચે પહોંચી ગયું છે. હવામાન વિભાગના જણાવ્યા અનુસાર આગામી 3 દિવસ સુધી કડકડતી ઠંડી રહેશે.
હિમાચલ પ્રદેશના પહાડી વિસ્તારોમાં આજે હિમવર્ષાની શક્યતા છે. બુધવારે લાહૌલ-સ્પીતિનું તાબો ગામ સૌથી ઠંડું હતું, અહીંનું તાપમાન -16.7ºC હતું. ગુરુવારે બપોરથી કાશ્મીર ઘાટીમાં પણ ભારે હિમવર્ષા પડશે.હરિયાણા અને પંજાબમાં તીવ્ર ઠંડી યથાવત છે. ચંદીગઢમાં 11.3 ડિગ્રી સેલ્સિયસ હતું. આ સાથે બંને રાજ્યોમાં ગાઢ ધુમ્મસ છવાયું હતું. આ સાથે કોલ્ડવેવ યથાવત છે. આગામી દિવસોમાં રાહતની કોઈ આશા નથી.
મધ્યપ્રદેશના ભોપાલ, જબલપુર-ગ્વાલિયર સહિત 14 જિલ્લામાં આજે કોલ્ડવેવનું એલર્ટ છે. અગાઉ રાજ્યના 37 જિલ્લાઓમાં સવારે મધ્યમથી ગાઢ ધુમ્મસ છવાયું હતું. ભોપાલ, ઉજ્જૈન અને શાજાપુરમાં એટલું ગાઢ ધુમ્મસ હતું કે વિઝિબિલિટી ઘટીને માત્ર 50 મીટર રહી ગઈ હતી. હવામાન વિભાગના જનરલ ડાયરેક્ટર મૃત્યુંજય મહાપાત્રાના જણાવ્યા અનુસાર આ વર્ષે જાન્યુઆરી મહિનો ગરમ રહેશે. પૂર્વ, ઉત્તર-પશ્ચિમ અને પશ્ચિમ-મધ્ય ભારત સિવાયના બાકીના પ્રદેશોમાં લઘુત્તમ તાપમાન સામાન્ય કરતાં વધુ રહેશે. મધ્ય ભારતમાં શીત લહેર સામાન્ય કરતાં વધુ રહેવાની ધારણા છે.
સરેરાશ પારો સામાન્ય કરતાં 0.65 ડિગ્રી ઉપર
વર્ષ 2024 ઈતિહાસનું સૌથી ગરમ વર્ષ હતું. આ પહેલા વર્ષ 2017 સૌથી ગરમ વર્ષ હતું. 2024 માં દેશનું સરેરાશ વાર્ષિક તાપમાન 25.75 ડિગ્રી સેલ્સિયસ નોંધાયું હતું, જે સામાન્ય (25.10 ડિગ્રી) કરતા 0.65 ડિગ્રી સેલ્સિયસ વધુ છે. IMD અનુસાર, 2024માં જુલાઈ, ઓગસ્ટ, સપ્ટેમ્બર અને ઓક્ટોબરમાં સતત ચાર મહિના માટે રાત્રિનું તાપમાન ઇતિહાસમાં સૌથી વધુ નોંધાયું હતું જ્યારે ફેબ્રુઆરી બીજો સૌથી ગરમ મહિનો હતો, જેના કારણે 2024 માટે વાર્ષિક રાત્રિ તાપમાન સૌથી વધુ નોંધાયું હતું. દિવસનું તાપમાન પણ વર્ષ દરમિયાન ચોથું સૌથી ગરમ નોંધાયું હતું, જેના પરિણામે ઇતિહાસમાં સૌથી વધુ સરેરાશ વાર્ષિક દિવસનું તાપમાન નોંધાયું હતું. IMDના મહાનિર્દેશક ડૉ. મૃત્યુંજય મહાપાત્રાએ જણાવ્યું હતું કે સરેરાશ વાર્ષિક તાપમાન 1901 થી 2024 સુધી સતત વધી રહ્યું છે, છેલ્લા દોઢ દાયકામાં તે ખૂબ જ ઝડપથી વધ્યું છે.
