સમલૈંગિક લગ્ન સંબંધિત રિવ્યુ પિટિશન પર સુપ્રીમ કોર્ટ કરશે વિચારણા

સુપ્રીમ કોર્ટની પાંચ ન્યાયાધીશોની બેંચ 9 જાન્યુઆરીએ ગે લગ્નને કાનૂની મંજૂરી આપવાનો ઇનકાર કરતા તેના ઓક્ટોબર 2023ના નિર્ણયની સમીક્ષા કરવાની અરજીઓ પર વિચાર કરશે. જસ્ટિસ બીઆર ગવઈ, જસ્ટિસ સૂર્યકાન્ત, જસ્ટિસ બીવી નાગરથ્ના, જસ્ટિસ પીએસ નરસિમ્હા અને જસ્ટિસ દીપાંકર દત્તાની બેન્ચ આ કેસ સાથે સંબંધિત 13 અરજીઓની ચેમ્બરમાં સુનાવણી કરશે.
પરંપરા મુજબ, રિવ્યુ પિટિશન પર જજ તેમની ચેમ્બરમાં વિચારણા કરે છે. સુપ્રીમ કોર્ટે રિવ્યુ પિટિશનની સુનાવણી ઓપન કોર્ટમાં કરવાની મંજૂરી આપવાનો ઇનકાર કરી દીધો હતો. ચીફ જસ્ટિસ જસ્ટિસ સંજીવ ખન્નાએ 10 જુલાઈ, 2024ના રોજ રિવ્યુ પિટિશનની સુનાવણીમાંથી પોતાને દૂર કર્યા પછી નવી બેંચની રચના કરવામાં આવી હતી. કોર્ટના કાર્યસૂચિ મુજબ, સમીક્ષા અરજીઓ પર 9 જાન્યુઆરીએ બપોરે 1.55 વાગ્યે વિચારણા કરવામાં આવશે.