નાઇજીરીયાના ઉત્તર-પૂર્વીય ક્ષેત્રમાં જેહાદી આત્મઘાતી હુમલામાં ઓછામાં ઓછા 27 નાઇજીરીયન સૈનિકો માર્યા ગયા. સમાચાર એજન્સી AFP અનુસાર, સૈનિકોએ બોર્નો અને યોબે રાજ્યો વચ્ચે સ્થિત એક ઉજ્જડ જમીનમાં ઇસ્લામિક સ્ટેટ (ISIS) સાથે જોડાયેલા આતંકવાદીઓના ઠેકાણા પર જમીન હુમલો કર્યો હતો.
આ હુમલો તાજેતરના વર્ષોમાં સૈન્યને નિશાન બનાવીને કરવામાં આવેલા સૌથી ઘાતક આત્મઘાતી હુમલાઓમાંનો એક હતો. બીજા એક અધિકારીએ જણાવ્યું કે હુમલા સમયે અંધારું હતું, જેના કારણે સૈનિકો આસપાસ સ્પષ્ટ જોઈ શકતા ન હતા. તેમણે એમ પણ કહ્યું કે ઘાયલોની સંખ્યા વધી શકે છે કારણ કે કેટલાકની હાલત “ગંભીર” છે.
એક આત્મઘાતી હુમલાખોરે ગીચ ઝાડીઓમાં છુપાયેલા પોતાના વિસ્ફોટકોથી ભરેલા વાહનને ઇસ્લામિક સ્ટેટ વેસ્ટ આફ્રિકા પ્રાંત (ISWAP) સામે કાર્યવાહી માટે આગળ વધી રહેલા સૈનિકોના કાફલા સાથે અથડાવી દીધું. આ હુમલો ‘ટિમ્બક્ટુ ત્રિકોણ’ વિસ્તારમાં થયો હતો, જે અગાઉ બોકો હરામના નિયંત્રણ હેઠળ હતો.
