ફ્રાન્સની રાજધાની પેરિસમાં આર્ટિફિશિયલ ઈન્ટેલિજન્સ (AI) એક્શન સમિટમાં વિશ્વભરના નેતાઓ અને ટેક દિગ્ગજોએ ભાગ લીધો હતો. વડાપ્રધાન મોદી અહીં પેરિસ સીઈઓ ફોરમમાં ગૂગલના સીઈઓ સુંદર પિચાઈ સહિત અનેક મોટી બિઝનેસ હસ્તીઓ સાથે મુલાકાત કરી હતી. સુંદર પિચાઈ ઉપરાંત સ્કેલ એઆઈના સ્થાપક અને સીઈઓ એલેક્ઝાન્ડર વાંગ પણ પીએમ મોદીને મળ્યા હતા. આ દરમિયાન, AI ઉદ્યોગના ભવિષ્ય વિશે ચર્ચા કરવામાં આવી હતી.
ગૂગલના સીઈઓ પિચાઈએ AI સમિટની બાજુમાં વડાપ્રધાન મોદીને મળ્યા બાદ કહ્યું કે AI ભારતમાં ઘણી મોટી તકો લાવશે. ભારત સાથે મળીને અમે દેશમાં ડિજિટલ પરિવર્તન લાવીશું.
પીએમ મોદીને મળ્યા બાદ તેમણે કહ્યું કે પેરિસમાં એઆઈ એક્શન સમિટ દરમિયાન અને પછી પીએમ મોદીને મળીને આનંદ થયો. અમે AI ના ભાવિ અને ભારત માટે ફાયદાકારક રહેલી તકો વિશે પણ ચર્ચા કરી. આપણે સાથે મળીને ભારતમાં ડિજિટલ ટ્રાન્સફોર્મેશન લાવી શકીએ છીએ. સુંદર પિચાઈ ઉપરાંત સ્કેલ AIના સ્થાપક અને સીઈઓ એલેક્ઝાન્ડર વાંગ પણ પીએમ મોદીને મળ્યા હતા. આ મુલાકાત બાદ તેણે સોશિયલ મીડિયા પર પોસ્ટ કર્યું કે પેરિસમાં નરેન્દ્ર મોદી અને ઈમેન્યુઅલ મેક્રોનને મળીને ખૂબ જ આનંદ થયો.
આ પહેલા પીએમ મોદીએ પેરિસમાં ઈન્ડિયા-ફ્રાન્સ સીઈઓ ફોરમને સંબોધિત કર્યું હતું, જેમાં તેમણે કહ્યું હતું કે આ ફોરમ આર્થિક સંબંધોને મજબૂત કરવામાં મહત્વની ભૂમિકા ભજવી શકે છે. તેમણે કહ્યું કે આ ફોરમ ભારત અને ફ્રાન્સના શ્રેષ્ઠ બિઝનેસ માઇન્ડનું ઘર છે. આ મંચ દ્વારા બંને દેશોની વ્યૂહાત્મક ભાગીદારી વધુ મજબૂત બને છે.
