સુરતમાં વડાપ્રધાનના આગમનને ધ્યાનમાં રાખી તડામાર તૈયારીઓ ચાલી રહી છે. હેલિપેડથી નિલગીરી સર્કલ સુધી મેગા રોડ-શોનું આયોજન કરવામાં આવ્યું છે. મહાપાલિકા મેયર દક્ષેશ માવાણી, ડે. મેયર ડૉ. નરેન્દ્ર પાટીલ, સ્થાયી સમિતિ ચેરમેન રાજન પટેલ અને શાસક પક્ષ નેતા શશી ત્રિપાઠી સહિતના નેતાઓએ ડેપ્યુટી કમિશનર નિધી સિવચ, ડેપ્યુટી કમિશનર ડો. આશિષ નાયક, સિટી ઇજનેર અક્ષય પંડ્યા સહિતના ઉચ્ચ અધિકારીઓ સાથે રૂટ પર તૈયારીઓનું નિરીક્ષણ કર્યું હતું.
વડાપ્રધાન સરકીટ હાઉસના ચોથા માળે રોકાવાના છે, પણ ત્યાં તાળાં બંધ હોવાને કારણે ડેપ્યુટી કમિશનર નિધી સિવચને 10-15 મિનિટ ઊભું રહેવું પડ્યું, જેનાથી તેઓ અકળાઈ ગયા અને સ્ટાફને ઠપકો આપ્યો. બાદમાં ચાવી લાવી રૂમ ખોલવામાં આવ્યા હતા. સરકીટ હાઉસ માર્ગ અને મકાન ખાતા હેઠળ હોવાને કારણે આવી મુશ્કેલી સર્જાઈ હોવાનું ચર્ચાઈ રહ્યું છે.અઠવા, લિંબાયત અને ઉધના ઝોનમાં વડાપ્રધાનના રૂટ પર બ્યૂટિફિકેશનના કામને યુદ્ધના ધોરણે પાર પાડવામાં આવી રહ્યું છે. ડિવાઈડરો, સર્કલો અને સરકારી-પાલિકાની દિવાલોને રંગરોગાન અને નવીન ચિત્રોથી શણગારવામાં આવી રહી છે. સાથે થર્મો-પ્લાસ્ટિક પેઇન્ટ અને સાઇનેજીસ પણ કરવામાં આવી રહ્યાં છે. આ બ્યૂટિફિકેશન માટે 3 કરોડથી વધુનો ખર્ચ થશે, જે વડાપ્રધાનની મુલાકાતને ભવ્ય બનાવવા માટે ઉગમાવાયો છે.
