દેશમાં યુનિફાઇડ પેમેન્ટ્સ ઇન્ટરફેસ (UPI)અ્ઢી કલાક માટે ડાઉન રહ્યું. આ ઉપરાંત 10થી વધુ બેંકોની સેવાઓ પણ પ્રભાવિત થઈ હતી. જોકે, આ ટેક્નિકલ ખામી પાછળનું કારણ બહાર આવ્યું નથી. ડાઉનડિટેક્ટરના જણાવ્યા અનુસાર, બુધવારે સાંજે 7 વાગ્યાથી યુઝર્સને UPI દ્વારા ચુકવણી કરવામાં સમસ્યાઓનો સામનો કરવો પડી રહ્યો હતો. 23,000થી વધુ યુઝર્સે ફરિયાદ કરી હતી કે ફંડ ટ્રાન્સફર, ચુકવણી અને લોગિન ઍક્સેસ શક્ય નહોતું.
નેશનલ પેમેન્ટ્સ કોર્પોરેશન ઓફ ઈન્ડિયા (NPCI) એ જણાવ્યું હતું કે, ‘યુઝર્સને કામચલાઉ ટેક્નિકલ સમસ્યાઓનો સામનો કરવો પડ્યો હતો જેના પરિણામે UPIમાં આંશિક વિક્ષેપ પડ્યો હતો. હવે આ સમસ્યાઓનું નિરાકરણ આવી ગયું છે. સિસ્ટમ સ્થિર બની ગઈ છે.’ ડાઉનડિટેક્ટર મુજબ, લગભગ 82% લોકોએ ચુકવણી કરવામાં સમસ્યાઓનો સામનો કર્યો હતો. જ્યારે 14% લોકોને ફંડ ટ્રાન્સફર મળ્યું અને લગભગ 5% લોકોને તે મેળવવામાં મુશ્કેલી પડી હતી.
ભારતમાં, RTGS અને NEFT ચુકવણી પ્રણાલીઓનું સંચાલન RBI પાસે છે. IMPS, RuPay, UPI જેવી સિસ્ટમો નેશનલ પેમેન્ટ કોર્પોરેશન ઓફ ઈન્ડિયા (NPCI) દ્વારા સંચાલિત થાય છે. સરકારે 1 જાન્યુઆરી, 2020થી UPI વ્યવહારો માટે શૂન્ય-ચાર્જ ફ્રેમવર્ક ફરજિયાત કર્યું હતું.
