ડબલ આફત : 17 જિલ્લામાં વરસાદનો ખતરો, કચ્છ-પોરબંદર અને ભાવનગરમાં હીટવેવની આગાહી

રાજ્યમાં હવામાન વિભાગે આજે 3 જિલ્લામાં હિટવેવની જ્યારે 17 જિલ્લામાં કમોસમી વરસાદની આગાહી કરી છે. મંગળવારે 1 એપ્રિલે રાજ્યના મોટાભાગના શહેરોમાં તાપમાનનો પારો 40 ડિગ્રીએ પહોંચ્યો હતો. આજે પણ અનેક શહેરોમાં ગરમી અગનગોળા વરસાવશે. મંગળવારે 42.2 ડિગ્રી તાપમાન સાથે રાજકોટ સૌથી ગરમ શહેર રહ્યું હતું. આજે પણ રાજકોટ, અમદાવાદ અને વડોદરા સહિત 6 શહેરોમાં તાપમાન 40 ડિગ્રીને પાર જવાની આગાહી કરવામાં આવી છે.
હવામાન વિભાગે આજે પોરબંદર જિલ્લામાં ગરમીનું ઓરેન્જ એલર્ટ તેમજ કચ્છ, ભાવનગર અને દીવમાં યલો એલર્ટ સાથે હિટવેવની આગાહી કરી છે. આ ઉપરાંત 17 જિલ્લાઓમાં છુટાછવાયા વરસાદની પણ આગાહી કરવામાં આવી છે. મધ્ય મહારાષ્ટ્ર ઉપર સાયક્લોનિક સર્ક્યુલેશનને લઈને ભેજ આવતા વરસાદની આગાહી કરવામાં આવી છે. આજે 2 એપ્રિલ 2025ના રોજ ઉત્તર ગુજરાતના સાબરકાંઠા, અરવલ્લી, મધ્ય ગુજરાતના વડોદરા, મહીસાગર, પંચમહાલ, દાહોદ અને છોટાઉદેપુર તેમજ દક્ષિણ ગુજરાતના ભરૂચ, નર્મદા, સુરત, તાપી, નવસારી, ડાંગ, વલસાડ, દમણ અને દાદરા નગર હવેલી જ્યારે સૌરાષ્ટ્રના અમરેલી, ભાવનગર, ગીર સોમનાથ અને દીવના છૂટાછવાયા સ્થળોએ મધ્ય વરસાદ અને ઝાપટાં વરસી શકે છે.
કમોસમી વરસાદ ઉપરાંત રાજ્યમાં આજે 2 એપ્રિલના રોજ હીટવેવની પણ આગાહી કરવામાં આવી છે. પોરબંદર જિલ્લામાં ગરમીનું ઓરેન્જ એલર્ટ તેમજ કચ્છ, ભાવનગર અને દીવમાં ગરમીનું યલો એલર્ટ જાહેર કર્યું છે.