વડાપ્રધાન નરેન્દ્ર મોદી શુક્રવારે (ચોથી જુલાઈ) સાંજે આર્જેન્ટિનાની રાજધાની બ્યુનોસ આયર્સ પહોંચ્યા.
57 વર્ષમાં ભારતીય વડાપ્રધાનની આર્જેન્ટિનાની આ પહેલી દ્વિપક્ષીય મુલાકાત છે. એઝેઇઝા
આંતરરાષ્ટ્રીય એરપોર્ટ પર તેમનું ભવ્ય સ્વાગત કરવામાં આવ્યું. આ 2 દિવસની મુલાકાતમાં વડાપ્રધાન
મોદી આર્જેન્ટિનાના પ્રમુખ જેવિયર માઇલી સાથે મહત્ત્વપૂર્ણ મુલાકાત કરશે અને બંને દેશો વચ્ચેના
સંબંધોને મજબૂત બનાવવા પર ચર્ચા કરશે. આ ઉપરાંત પીએમ મોદી આર્જેન્ટિનાના બોકા જુનિયર્સ
સ્ટેડિયમની મુલાકાત લેશે અને આર્જેન્ટિનાના ફૂટબોલ સંસ્કૃતિને નજીકથી જોશે.
વિદેશ મંત્રાલયના જણાવ્યાનુસાર, વડાપ્રધાન નરેન્દ્ર મોદી અને આર્જેન્ટિનાના પ્રમુખ જેવિયર માઇલી
સંરક્ષણ, કૃષિ, ખનન, ક્રૂડ અને ગેસ, નવીનીકરણીય ઉર્જા, વેપાર અને રોકાણ જેવા ઘણાં મહત્ત્વપૂર્ણ
ક્ષેત્રોમાં સહયોગ વધારવાની ચર્ચા કરશે. આ મુલાકાત ભારત અને આર્જેન્ટિના વચ્ચે બહુપક્ષીય
વ્યૂહાત્મક ભાગીદારીને વધુ ગાઢ બનાવશે.
