ઉત્તરાખંડના ઉત્તરકાશી જિલ્લાનાં ધારાલી ગામમાં વાદળ ફાટતા ભારે તબાહી મચી ગઈ છે. પુર બાદ ભૂસ્ખલન થતા અનેક ઘર-હોટલો તણાયા હતા. આ દુર્ઘટનામાં અત્યાર સુધીમાં 10થી વધુ લોકોના મૃત્યુ થયા હોવાના અહેવાલ છે. જયારે ધારાલી, સુખી અને હર્ષિલમાં એનડીઆરએફ, એસડીઆરએફ અને સેના દ્વારા રેસ્ક્યુ ઓપરેશન ચલાવવામાં આવી રહ્યું છે. તેમજ 130થી વધુ લોકોને બચાવવામાં આવ્યા છે. ભારે કીચડના પગલે રેસ્ક્યુ ઓપરેશનમાં મુશ્કેલી પડી રહી છે.
આ વિસ્તારમાં વાદળ ફાટતા ઉભી થયેલી સ્થિતિને પહોંચી વળતા વહીવટીતંત્ર કામે લાગ્યું છે. જોકે, ખરાબ હવામાનના કારણે રાહત અને બચાવ કાર્યમાં મુશ્કેલી પડી રહી છે. ટીમો વાદળ ફાટવાની ઘટનામાં લાપતા લોકોને શોધવાનો પ્રયાસ કરી રહ્યા છે. જયારે શબને શોધવા માટે શ્વાનની મદદ લેવામાં આવી રહી છે. જયારે અન્ય રાજયોની રેસ્ક્યુ ટીમ પણ ઉત્તરાખંડ પહોંચી છે. ઉત્તર કાશીમાં વાદળ ફાટવાની ઘટનામાં હર્ષિલનો આર્મી કેમ્પ પણ તબાહ થયો છે. હેલીપેડ ડૂબી ગયું છે. જયારે હરિદ્વાર -ભીમગૌડા ટનલ નજીક પહાડનો કાટમાળ પડતા રેલ્વે લાઇન બંધ થઈ છે. આ ઉપરાંત આજે પણ ઉત્તરાખંડના અનેક વિસ્તારોમાં ભારે વરસાદનું એલર્ટ આપવામાં આવ્યું છે. હવામાન વિભાગે હરિદ્વાર અને નૈનીતાલ સહિતના વિસ્તારોમાં ભારે વરસાદની આગાહી કરી છે.
PM નરેન્દ્ર મોદીએ કરી પુષ્કર ધામી સાથે વાતચીત
ધરાલીમાં મંગળવારે થયેલી આપત્તિ બાદ, વડાપ્રધાન નરેન્દ્ર મોદીએ ઉત્તરાખંડના મુખ્યમંત્રી પુષ્કર સિંહ ધામી સાથે ફોન પર વાત કરી અને વર્તમાન પરિસ્થિતિ વિશે પૂછપરછ કરી હતી. આ દરમિયાન રાહત અને બચાવ કાર્ય વિશે માહિતી લેવામાં આવી. ધામીએ વડાપ્રધાનને જણાવ્યું કે, રાજ્ય સરકાર સંપૂર્ણ તૈયારી સાથે રાહત અને બચાવ કામગીરીમાં રોકાયેલી છે. સતત ભારે વરસાદને કારણે કેટલાક વિસ્તારોમાં મુશ્કેલીઓનો સામનો કરવો પડી રહ્યો છે, પરંતુ તમામ સંબંધિત એજન્સીઓ સંકલનમાં કામ કરી રહી છે જેથી અસરગ્રસ્ત લોકોને શક્ય તેટલી વહેલી તકે મદદ મળી શકે. વડાપ્રધાન મોદીએ કેન્દ્ર સરકાર તરફથી શક્ય તમામ સહાયની ખાતરી આપી છે.
ભારે વરસાદથી ભયંકર આફત
ઉત્તરાખંડના ઉત્તરકાશીમાં મંગળવારે ભારે વરસાદ બાદ વાદળ ફાટવાથી ભયંકર આફત સર્જાઈ હતી. આ વિનાશમાં ધારાલી ગામ સંપૂર્ણપણે નાશ પામ્યું હતું. આખેઆખું ગામ કાટમાળમાં ફેરવાઈ ગયું હતું. પાણીના પૂર વચ્ચે લોકોના બૂમોથી હૃદય હચમચી ગયું હતું. આ અકસ્માતમાં અત્યાર સુધીમાં ચાર લોકોના મોત થયા છે, જ્યારે પચાસથી વધુ લોકો ગુમ થયાના અહેવાલ છે. આ દરમિયાન, સેનાનું બચાવ કાર્ય ચાલુ છે.
