દક્ષિણ એશિયાના બે પાડોશી દેશો પાકિસ્તાન અને અફઘાનિસ્તાન વચ્ચેના સંબંધોમાં અત્યારે ભારે
કડવાશ જોવા મળી રહી છે. છેલ્લા કેટલાક સમયથી ચાલી રહેલી ખેંચતાણ હવે ખુલ્લા સંઘર્ષમાં ફેરવાતી
જઈ રહી હોય તેવું જણાય છે. પાકિસ્તાન દ્વારા તાજેતરમાં અફઘાનિસ્તાનની સરહદમાં ઘૂસીને કરવામાં
આવેલી એરસ્ટ્રાઈકે બળતામાં ઘી હોમવાનું કામ કર્યું છે. આ હુમલા બાદ કાબુલ અને ઈસ્લામાબાદ
વચ્ચેની કૂટનીતિક મડાગાંઠ વધુ ઘેરી બની છે અને બંને દેશો સામસામે આવી ગયા છે.
અફઘાનિસ્તાનના ઇસ્લામિક અમીરાતના પ્રવક્તા ઝબીહુલ્લાહ મુજાહિદે પાકિસ્તાની હુમલાનો જડબાતોડ
જવાબ આપવાની જાહેરાત કરી છે. એક ઇન્ટરવ્યુ દરમિયાન તેમણે સ્પષ્ટ કર્યું હતું કે પાકિસ્તાનની આ
હરકત સામે અફઘાનિસ્તાન મૌન નહીં રહે. જ્યારે તેમને પૂછવામાં આવ્યું કે આ પ્રતિક્રિયા રાજકીય હશે કે
સૈન્ય, ત્યારે મુજાહિદે મક્કમતાથી જણાવ્યું કે અફઘાનિસ્તાન “સ્વાભાવિક રીતે જ” સૈન્ય કાર્યવાહી દ્વારા
જવાબ આપશે. તેમણે આ આક્રમક વલણ અપનાવીને સંકેત આપ્યો છે કે હવે વાતચીતનો દોર પૂરો
થઈ ચૂક્યો છે.
મુજાહિદે વધુમાં ઉમેર્યું હતું કે પાકિસ્તાનને તેના “શર્મનાક કૃત્ય” માટે યોગ્ય સમયે સચોટ જવાબ
આપવામાં આવશે, જોકે સુરક્ષાના કારણોસર તેની વિગતો અત્યારે જાહેર કરવામાં આવી નથી.
અફઘાનિસ્તાન આ એરસ્ટ્રાઈકને તેની પ્રાદેશિક સાર્વભૌમત્વનું સીધું ઉલ્લંઘન માની રહ્યું છે. તાલિબાન
શાસનનું કહેવું છે કે આવા હુમલાઓ અફઘાનિસ્તાનની સુરક્ષા અને અખંડિતતાને પડકારવા સમાન છે,
જેની સામે તેઓ કોઈ પણ ભોગે નમતું જોખવા તૈયાર નથી.
ઉલ્લેખનીય છે કે 21-22 ફેબ્રુઆરીની રાત્રે પાકિસ્તાની વાયુસેનાએ અફઘાનિસ્તાનના નંગરહાર અને
પક્તિકા પ્રાંતોમાં ભારે બોમ્બમારો કર્યો હતો. પાકિસ્તાનનો એવો દાવો છે કે આ એરસ્ટ્રાઈકમાં 70થી વધુ
આતંકવાદીઓ ઠાર થયા છે. જોકે, અફઘાનિસ્તાન આ દાવાને ફગાવતા જણાવી રહ્યું છે કે પાકિસ્તાને
નિર્દોષ નાગરિકોને નિશાન બનાવ્યા છે અને આ હુમલામાં આશરે 19 સામાન્ય લોકોના મોત નિપજ્યા
છે. આ વિરોધાભાસી દાવાઓને કારણે બંને દેશો વચ્ચેના વિશ્વાસમાં મોટું ગાબડું પડ્યું છે.
રક્ષણ નિષ્ણાતો માની રહ્યા છે કે જો બંને દેશો વચ્ચે સૈન્ય સંઘર્ષ વધશે તો દક્ષિણ એશિયામાં અસ્થિરતા
વધી શકે છે. દ્વિપક્ષીય વાટાઘાટો અને શાંતિના પ્રયાસો અત્યારે અટકી પડ્યા હોય તેમ લાગે છે.
અફઘાનિસ્તાનનો કડક મિજાજ સૂચવે છે કે આવનારા દિવસોમાં સરહદ પર સ્થિતિ વધુ ગંભીર બની શકે
છે. હવે આંતરરાષ્ટ્રીય સમુદાયની નજર એ વાત પર છે કે પાકિસ્તાન અફઘાનિસ્તાનના આ લશ્કરી
પડકાર સામે કેવો પ્રતિસાદ આપે છે.
