ભારતે ફરી એકવાર સંયુક્ત રાષ્ટ્રમાં પાકિસ્તાનની ટીકા કરી. સંયુક્ત રાષ્ટ્રમાં ભારતના કાયમી પ્રતિનિધિ
પી. હરીશે જણાવ્યું હતું કે પાકિસ્તાન અહમદિયા સમુદાય અને લાચાર અફઘાન લોકો પર અત્યાચાર કરી
રહ્યું છે અને ઇસ્લામોફોબિયાની ખોટી વાર્તાઓ ઘડી રહ્યું છે.
સંયુક્ત રાષ્ટ્રમાં ભારતના કાયમી પ્રતિનિધિ પી. હરીશે જણાવ્યું હતું કે ભારતનો પશ્ચિમી પાડોશી તેની
ધાર્મિક ઓળખનો ઉપયોગ હથિયાર તરીકે કરે છે અને તેના સંકુચિત રાજકીય ઉદ્દેશ્યોને આગળ વધારવા
માટે યુએન પ્લેટફોર્મનો દુરુપયોગ કરે છે.
સંયુક્ત રાષ્ટ્રમાં ભારતના કાયમી પ્રતિનિધિ પાર્વથાનેની હરીશે જણાવ્યું હતું કે, “ભારત એક એવો દેશ છે
જ્યાં વિશ્વના લગભગ તમામ મુખ્ય ધર્મોના લોકો શાંતિપૂર્ણ રીતે સહઅસ્તિત્વ ધરાવે છે. વધુમાં, ચાર
મુખ્ય ધર્મો, જેમ કે હિન્દુ ધર્મ, બૌદ્ધ ધર્મ, જૈન ધર્મ અને શીખ ધર્મ, ભારતમાં ઉદ્ભવ્યા છે. તેથી, ભારત
ધાર્મિક ભેદભાવથી મુક્ત વિશ્વની જરૂરિયાતને અન્ય કોઈપણ દેશ કરતાં વધુ સારી રીતે સમજે છે.”
ભારતીય રાજદૂતે સંયુક્ત રાષ્ટ્રને જવાબદાર ઠેરવતા કહ્યું, “સંયુક્ત રાષ્ટ્રની કલ્પના એક એવી સંસ્થા
તરીકે કરવામાં આવી હતી જે ધર્મ, સંસ્કૃતિ અને રાજકારણથી આગળ વધે છે. તેથી અમે કોઈપણ
માળખા અંગે સાવધાની રાખવાની જરૂરિયાત પર ભાર મૂકીએ છીએ જે ફક્ત એક ધર્મ પર ધ્યાન કેન્દ્રિત
કરે છે અને ધાર્મિક ફોબિયાની વ્યાપક સમસ્યાને અવગણે છે.”
તેમણે ઉમેર્યું, “અમારા મતે, ધર્મ અથવા માન્યતા પર આધારિત તમામ પ્રકારની અસહિષ્ણુતા અને
ભેદભાવ નાબૂદ કરવા અંગે 1981 ની ઘોષણા એક સંતુલિત દસ્તાવેજ છે જે કોઈપણ એક ધર્મને
વિશેષાધિકાર આપ્યા વિના તમામ ધાર્મિક લોકોના અધિકારોનું રક્ષણ સુનિશ્ચિત કરે છે.
સંયુક્ત રાષ્ટ્રમાં ભારતના કાયમી પ્રતિનિધિએ જણાવ્યું હતું કે, “સંયુક્ત રાષ્ટ્રએ ધાર્મિક ઓળખના
શસ્ત્રીકરણ અને સંકુચિત રાજકીય હેતુઓ માટે તેના દુરુપયોગ સામે સતર્ક રહેવું જોઈએ અને આ
જોખમોના વધતા વલણની ગંભીર નોંધ લેવી જોઈએ.
