ભાવનગર જિલ્લામાં મેઘમહેર:ધરતીપુત્રોમાં ખુશીની લહેર

ભાવનગર,તા.4
ભાવનગર જિલ્લામાં શુક્રવારે દિવસભર વરસાદી માહોલ જળવાઈ રહ્યો હતો. જિલ્લામાં સર્વત્ર જોરદાર ઝાપટાથી લઈને બે ઇંચ જેટલો નોંધપાત્ર વરસાદ ખાબક્યો હતો. લાંબા સમયની રાહ જોયા બાદ સારો વરસાદ પડતાં ખેડૂતોમાં આનંદ છવાયો છે અને જિલ્લાભરમાં ખરીફ પાકની વાવણીનો શુભારંભ કરી દેવામાં આવ્યો છે.
શુક્રવારે દિવસભર શરુ રહેલા વરસાદી માહોલથી વાતાવરણમાં ઠંડક પ્રસરી જવા પામી છે. અને ધરતીપુત્રો પણ ખુશ જોવા મળી રહ્યા છે. આજે શનિવાર સવાર સુધીના સત્તાવાર આંકડા મુજબ, જિલ્લામાં સૌથી વધુ વરસાદ વલભીપુરમાં નોંધાયો છે. આજે શનિવારે પણ ભાવનગર શહેરમાં સવારથી જ આકાશ વાદળછાયું છે અને વરસાદી માહોલ જોવા મળી રહ્યો છે. સવારના સુમારે વલભીપુર અને ગારિયાધાર પંથકમાં વરસાદના જોરદાર ઝાપટા પડ્યા હતા.
ખાસ કરીને પાલીતાણા, સિહોર અને વલભીપુર સહિતના પંથકમાં પડેલા સારા વરસાદના કારણે ચેકડેમ અને અન્ય જળાશયોમાં નવા નીરની આવક થવા પામી છે. સર્વત્ર પડેલા આ વરસાદને કારણે તાપમાનમાં મોટો ઘટાડો થતાં લોકો ગરમીથી રાહત મેળવી વાતાવરણમાં ગુલાબી ઠંડકનો અહેસાસ કરી રહ્યા છે.
બોક્સ…
ચોવીસ કલાકમાં જિલ્લાના વિવિધ તાલુકાનો વરસાદ
વલભીપુર: 45 મી.મી.
ઉમરાળા: 44 મી.મી.
પાલીતાણા: 39 મી.મી.
સિહોર: 31 મી.મી.
ભાવ. શહેર: 28 મી.મી.
ઘોઘા: 17 મી.મી.
ગારીયાધાર: 14 મી.મી.
તળાજા: 13 મી.મી.
જેસર: 9 મી.મી.
મહુવા: 4 મી.મી.