ત્રણેય શૂટરોને છોડીશ નહીં- જેલમાં બંધ અતીકના પુત્ર અલીની ધમકી

અતીક અહમદ અને અશરફની પોલીસ કસ્ટડીમાં હત્યા કરવામાં આવ્યા પછી હવે નૈની જેલમાં બંધ અતીક અહમદનો પુત્ર અલી ભડક્યો છે. નાના ભાઈ અસદના એન્કાઉન્ટર પછી પિતા અને કાકાની હત્યા પછી તેના ત્રણેય શૂટરોને છોડીશ નહી, એમ કહીને તેણે હિસાબ ચુકવવાની ધમકી આપી છે. આ સિવાય તેના જેલમાં ઈજાગ્રસ્ત થવાના પણ સમાચાર હતા. જોકે જેલ પ્રશાસને તેનું ખંડન કરતા અલી સંપૂર્ણ સ્વસ્થ્ય હોવાની વાત કહી છે.
પ્રાપ્ત માહિતી મુજબ પિતાને અતીકની હત્યાની માહિતી મળ્યા પછી અલી ભડક્યો છે. સોમવારે નૈની જેલમાં અલી અહમદ ભડક્યો હોવાના સમાચાર છે. તેણે દિવાલ સાથે માથુ અથડાવ્યું હોવાના પણ સમાચાર હતા, જોકે જેલ પ્રશાસને તેને અફવા ગણાવી અને અલી સંપૂર્ણ રીતે સ્વસ્થ્ય હોવાની વાતની પુષ્ટિ કરી. અલી નૈની જેલમાં છે. અતીક અને અશરફ અહમદની હત્યા કરનાર ત્રણેય આરોપીઓની સુરક્ષાને ધ્યાનમાં રાખીને સની, લવલેશ અને અરુણને નૈની જેલથી પ્રતાપગઢ જેલમાં શિફ્ટ કરવામાં આવ્યા છે.