ઈઝરાયેલે શુક્રવારે ગાઝાની મોટી હોસ્પિટલ અલ-શિફાને નિશાન બનાવી હતી. ગાઝાના સ્વાસ્થ્ય મંત્રાલયે દાવો કર્યો હતો કે ઈઝરાયલી દળોએ ઘાયલોને પહેલા હોસ્પિટલમાં અને પછી જ્યારે તેઓ ઘાયલોને એમ્બ્યુલન્સમાં લઈ જઈ રહ્યા હતા ત્યારે હુમલો કર્યો હતો. મીડિયા રિપોર્ટ્સ અનુસાર તાજેતરના બોમ્બ ધડાકામાં ઘણા લોકો માર્યા ગયા છે. ઈઝરાયેલની સેનાએ કહ્યું છે કે તે તેની તપાસ કરી રહી છે.
ઇઝરાયેલના વડા પ્રધાન બેન્જામિન નેતન્યાહૂએ યુએસના વિદેશ મંત્રી બ્લિંકનને કહ્યું કે તેઓ બંધકોને મુક્ત કર્યા વિના આતંકવાદી જૂથ હમાસ વિરુદ્ધ યુદ્ધ બંધ નહીં કરે. નેતન્યાહુએ ઈઝરાયેલે ગાઝામાં ઈંધણ પ્રવેશવા દેવાના તમામ અહેવાલોને પણ ફગાવી દીધા અને કહ્યું કે અમે ઈંધણને ગાઝામાં પ્રવેશવા નહીં દઈએ. નેતન્યાહુએ બ્લિંકનને કહ્યું કે ઇઝરાયેલ અસ્થાયી યુદ્ધવિરામને નકારી કાઢે છે જેમાં ઇઝરાયેલી બંધકોની મુક્તિનો સમાવેશ થતો નથી. નેતન્યાહુએ વચન આપ્યું હતું કે અમારી જીત ટૂંક સમયમાં નક્કી જ છે. અને પેઢીઓ સુધી ઉજવવામાં આવશે. નેતન્યાહુએ એમ પણ કહ્યું કે ઈઝરાયેલના દુશ્મનોનું લક્ષ્ય દેશને બરબાદ કરવાનું છે, પરંતુ તેઓ આમાં ક્યારેય સફળ નહીં થાય. તેમણે સ્પષ્ટ કર્યું કે ઇઝરાયલ જ્યાં સુધી વિજય હાંસલ નહીં કરે ત્યાં સુધી અટકશે નહીં.
અમેરિકા હંમેશા ઇઝરાયલની સાથે : બ્લિંકન
અમેરિકી વિદેશ મંત્રી એન્ટની બ્લિંકન શુક્રવારે તેલ અવીવમાં ઈઝરાયલના વડાપ્રધાન બેન્જામિન નેતન્યાહુને મળ્યા અને ફરી એકવાર ઈઝરાયેલને સમર્થન આપવાની પ્રતિબદ્ધતાનો પુનરોચ્ચાર કર્યો. બ્લિંકને કહ્યું કે જ્યાં સુધી અમેરિકાનું સમર્થન છે ત્યાં સુધી ઈઝરાયેલ ક્યારેય એકલું નહીં રહે. તેલ અવીવમાં એક પ્રેસ કોન્ફરન્સમાં અમેરિકાના વિદેશ મંત્રીએ ઇઝરાયેલ પર હમાસના હુમલાની બર્બરતાનો પણ ઉલ્લેખ કર્યો હતો. બ્લિંકને કહ્યું કે તેમણે ગાઝામાં યુદ્ધની વચ્ચે માનવતાવાદી આધાર પર સંઘર્ષને સમાપ્ત કરવાના અમેરિકાના ઈરાદા વિશે ઈઝરાયેલી નેતૃત્વ સાથે વાત કરી છે. તેમણે કહ્યું કે ઇઝરાયેલના અધિકારીઓ સાથેની તેમની વાટાઘાટોમાં ગાઝામાં વધુ માનવતાવાદી સહાય મેળવવા, બંધકોની મુક્તિની ખાતરી કરવા અને હમાસને અસ્થાયી યુદ્ધવિરામનો લાભ લેવાથી રોકવા માટે કેવી રીતે ઉપયોગ કરી શકાય તે અંગે પ્રશ્નો ઉભા થયા. બ્લિંકને કહ્યું કે પેલેસ્ટિનિયન નાગરિકોની સુરક્ષા માટે આપણે વધુ કરવાની જરૂર છે. એ પણ પુનરોચ્ચાર કર્યો કે ઇઝરાયેલને પોતાનો બચાવ કરવાનો અધિકાર છે.
