મહાદેવ સટ્ટાબાજી એપ કેસને લઈને એન્ફોર્સમેન્ટ ડિરેક્ટોરેટ (ED)ની તપાસ વચ્ચે IT મંત્રાલયે રવિવારે મહાદેવ બુક ઓનલાઈન અને અન્ય 21 સટ્ટાબાજીની એપ્સ અને વેબસાઈટ્સ સામે બ્લોક કરવાનો આદેશ જારી કર્યો છે. EDની ભલામણ બાદ ઈન્ફોર્મેશન ટેક્નોલોજી એક્ટની કલમ 69A હેઠળ આ આદેશ જારી કરવામાં આવ્યો છે. આઈટી રાજ્ય મંત્રી રાજીવ ચંદ્રશેખરે આજે આ અંગે એક નિવેદન બહાર પાડ્યું છે. તેમાં કહેવામાં આવ્યું છે કે, ‘છત્તીસગઢ સરકારને કલમ 69A આઈટી એક્ટ હેઠળ વેબસાઈટ/એપને બંધ કરવાની ભલામણ કરવાનો અધિકાર છે. રાજીવ ચંદ્રશેખરે દાવો કર્યો હતો કે રાજ્ય સરકાર દ્વારા છેલ્લા દોઢ વર્ષથી તેની તપાસ કરવામાં આવી રહી હોવા છતાં આ એપ અંગે આવી કોઈ અપીલ કરવામાં આવી નથી. ઇડી તરફથી પ્રથમ અને એકમાત્ર અપીલ આવી અને તેના પર કાર્યવાહી કરવામાં આવી.
