ટ્રેન સળગાવવાની ઘટના શુક્રવારે રાત્રે બાંગ્લાદેશમાં બની હતી. એક પેસેન્જર ટ્રેનને કથિત રીતે બદમાશો દ્વારા આગ લગાડવામાં આવતા ઓછામાં ઓછા પાંચ લોકો માર્યા ગયા હતા અને ઘણા લોકો ઘાયલ થયા હતા. આ ઘટના રાજધાની ઢાકાના ગોપીબાગ વિસ્તારમાં બેનાપોલ એક્સપ્રેસમાં બની હતી. બાંગ્લાદેશમાં સામાન્ય ચૂંટણીના બે દિવસ પહેલા જ આ ઘટના બની હતી. નોંધનીય છે કે, વિપક્ષ ચૂંટણીનો બહિષ્કાર કરી રહ્યો છે. જેના કારણે સમગ્ર દેશમાં અશાંતિનું વાતાવરણ છે.
ડેલી સ્ટારના અહેવાલ મુજબ ગોપીબાગ વિસ્તારમાં રાત્રે લગભગ 9 વાગ્યે આગ લાગી હતી. રાત્રે 10.20 વાગ્યા સુધીમાં આગ પર કાબુ મેળવી લેવામાં આવ્યો હતો. ટ્રેનમાં સવાર ઘણા મુસાફરો ભારતીય નાગરિકો હતા. આગ ઢાકા જતી ટ્રેનના ઓછામાં ઓછા ચાર કોચમાં ફેલાઈ ગઈ હતી. પોલીસે જાનહાનિ અને નુકસાનની જાણકારી મેળવવા માટે સર્ચ ઓપરેશન હાથ ધર્યું છે. પોલીસને આશંકા છે કે કોચની અંદર હજુ પણ ઘણા લોકો ફસાયેલા હોઈ શકે છે. આ ટ્રેન ઢાકાને બાંગ્લાદેશના સૌથી મહત્વપૂર્ણ લેન્ડ પોર્ટ બેનાપોલથી જોડે છે.
બાંગ્લાદેશમાં રવિવારે નિર્ણાયક સંસદીય ચૂંટણી પહેલા હિંસાએ ચૂંટણીઓ પર અસર કરી છે. મુખ્ય વિપક્ષી બાંગ્લાદેશ નેશનાલિસ્ટ પાર્ટી (BNP) અને તેના સહયોગીઓએ વડાપ્રધાન શેખ હસીનાના રાજીનામાની અને મુક્ત અને નિષ્પક્ષ ચૂંટણીઓ યોજવા માટે રખેવાળ સરકારની રચનાની માંગ સાથે ચૂંટણી પ્રક્રિયાનો સંપૂર્ણ બહિષ્કાર કરવાની હાકલ કરી છે.
